විනෝදාස්වාද ක්ෂේත්රයේ දැවැන්ත පෙරළියක් සනිටුහන් කරමින් මාස කිහිපයක් තිස්සේ පැවැති ‘වෝනර් බ්රදර්ස් ඩිස්කවරි’ සමාගම අත්පත් කර ගැනීමේ සටනින් ජය ගැනීමට පැරාමවුන්ට් සමාගම සමත්ව තිබේ. පසුගිය බ්රහස්පතින්දා නෙට්ෆ්ලික්ස් සමාගම එම වෙන්දේසියෙන් නිල වශයෙන් ඉවත් වීමත් සමඟ පැරාමවුන්ට් සමාගමට මෙම ජයග්රහණය හිමි විය. වෝනර් බ්රදර්ස් අධ්යක්ෂ මණ්ඩලය විසින් පැරාමවුන්ට් සමාගම ඉදිරිපත් කළ මිල ගණන් වඩාත් ඉහළ සහ විශිෂ්ට මට්ටමක පවතින බව තීරණය කිරීමෙන් පසු, තමන් ඉදිරිපත් කළ ලංසුව තවදුරටත් ඉහළ දැමීම නෙට්ෆ්ලික්ස් සමාගම ප්රතික්ෂේප කිරීම මෙම තීරණයට ප්රධානතම හේතුව වී ඇත.
මෙම ඓතිහාසික ගනුදෙනුවත් සමඟ ලොව ප්රමුඛතම පුවත් සේවාවක් වන CNN ඇතුළු වෝනර් බ්රදර්ස් සතු දැවැන්ත මාධ්ය අධිරාජ්යය පාලනය කිරීමේ අවස්ථාව පැරාමවුන්ට් සමාගමට උදාවනු ඇත. ඒ අනුව CNN, HBO සහ වෝනර් බ්රදර්ස් සතු සෙසු සියලුම දේපළවල අයිතිය අත්පත් කර ගැනීමට ඔවුන් දැන් ඉතා සමීපව සිටියි. නෛතික සහ නියාමන සමාලෝචන ක්රියාවලීන් සම්පූර්ණ කිරීම සඳහා තවත් මාස කිහිපයක් ගතවනු ඇතැයි අපේක්ෂා කෙරෙන අතර, තවත් අනපේක්ෂිත බාධාවක් මතු නොවන්නේ නම් මෙම ඒකාබද්ධ වීම විනෝදාස්වාද ක්ෂේත්රයේ අලුත් පරිච්ඡේදයක් සනිටුහන් කරනු නිසැකය. පැරාමවුන්ට් ප්රධාන විධායක නිලධාරී ඩේවිඩ් එලිසන් විසින් මෙහෙයවනු ලබන මෙම නව ව්යාපාරික ව්යුහය යටතේ රූපවාහිනී නාලිකා, චිත්රපට චිත්රාගාර සහ ප්රමුඛ පෙළේ පුවත් ආයතන රැසකින් සමන්විත ලොව බලවත්ම මාධ්ය අධිරාජ්යයක් ගොඩනැගෙනු ඇතැයි විදෙස් මාධ්ය වැඩිදුරටත් වාර්තා කරයි.
