මෙරට තරුණ පරපුරේ උන්නතිය වෙනුවෙන් ක්රියාත්මක “තාරුණ්ය සඳහා වන පාර්ලිමේන්තු සංසදයේ” 2026 වසරේ ඉදිරි සැලසුම් පිළිබඳ විශේෂ සාකච්ඡාවක් පසුගියදා (17) පාර්ලිමේන්තු සංකීර්ණයේදී පැවැත්විණි. සංසදයේ සභාපති, නියෝජ්ය අමාත්ය එරංග ගුණසේකර මහතාගේ ප්රධානත්වයෙන් පැවැති මෙම රැස්වීමේදී තරුණ ප්රජාව සවිබල ගැන්වීම සඳහා වූ තීරණාත්මක කරුණු කිහිපයක් සාකච්ඡාවට බඳුන් විය.
තරුණ පරපුරට අදාළ ප්රතිපත්තිමය සහ සංකල්පීය කරුණු හුදෙක් සාකච්ඡාවලට පමණක් සීමා නොකර, ඒවා රාජ්ය අංශයේ යාන්ත්රණයන් හරහා ප්රායෝගිකව ක්රියාත්මක කළ හැකි මට්ටමට වර්ධනය කිරීමේ අවශ්යතාව සභාපතිවරයා විසින් අවධාරණය කරන ලදී.
තරුණ කටයුතු සහ ක්රීඩා අමාත්යාංශය මගින් මේ වන විට සකස් කරමින් පවතින “යෝජිත ජාතික තරුණ ප්රතිපත්ති කෙටුම්පත” පිළිබඳව මෙහිදී දීර්ඝ ලෙස සාකච්ඡා වී තිබේ. අදාළ කෙටුම්පත සම්බන්ධයෙන් ඉදිරි පියවර ගැනීම සඳහා අමාත්යාංශය සමඟ සෘජුව සම්බන්ධ වීමට ද තීරණය විය.
තාරුණ්යයට බලපාන වත්මන් නීති පද්ධතියේ අවශ්ය ප්රතිසංස්කරණ හඳුනා ගැනීම, දත්ත මත පදනම් වූ විද්යාත්මක වැඩසටහන් සකස් කිරීම සහ ජාත්යන්තර තරුණ සංසද සමඟ ඒකාබද්ධව කටයුතු කිරීම පිළිබඳව ද මෙහිදී මන්ත්රීවරුන්ගේ අවධානය යොමු විය.
මෙම රැස්වීම සඳහා සංසදයේ නියෝජ්ය සම සභාපතිවරුන් වන පාර්ලිමේන්තු මන්ත්රී ලසිත් භාෂණ ගමගේ සහ තනුර දිසානායක යන මහත්වරුන් ඇතුළු සාමාජික මන්ත්රීවරුන් පිරිසක් එක්ව සිටියහ. තරුණ පරපුරේ හඬ පාර්ලිමේන්තුව තුළ ශක්තිමත් කිරීම මෙම සංසදයේ මූලික අරමුණයි.
