ඇමරිකානු ආරක්ෂක මූලස්ථානය වන පෙන්ටගනය තුළ 1980 වසරේ සිට අඛණ්ඩව පවත්වාගෙන ආ කතෝලික මහ සිකුරාදා දේව මෙහෙය මෙවර පළමු වරට අවලංගු කිරීමට එරට ගුවන් හමුදා නායකත්වය පියවර ගෙන තිබේ. දශක හතරකට වැඩි කාලයක් පැවති මෙම ආගමික සම්ප්රදාය හදිසියේ නතර කර ඒ වෙනුවට ප්රොතෙස්තන්ත බැතිමතුන් සඳහා පමණක් දේව මෙහෙයක් පැවැත්වීමට තීරණය කිරීම පෙන්ටගනයේ සේවය කරන කතෝලිකයන්ගේ දැඩි අප්රසාදයට හේතු වී ඇත. මෙම තීරණය හුදෙක් පරිපාලනමය වෙනසක් නොව, වත්මන් ඇමරිකානු යුද ලේකම් පීට් හෙග්සෙත්ගේ දැඩි මතවාදී ස්ථාවරයන් සහ කතෝලික සභාවේ ඉගැන්වීම් අතර පවතින ගැටුමක ප්රතිඵලයක් බව දේශපාලන විචාරකයෝ පෙන්වා දෙති.
විචාරකයන් පවසන පරිදි මෙම විරසකයට ප්රධානතම හේතුව වී ඇත්තේ යුද්ධය සහ මානුෂීය අයිතිවාසිකම් පිළිබඳ පාප්තුමා දරන ස්ථාවරයයි. “යුද්ධය ශුද්ධ වූවක්” ලෙස හෙග්සෙත් දරන මතය පාප්තුමා විසින් මීට පෙර දැඩි ලෙස විවේචනය කර ඇති අතර, සංක්රමණිකයන් සහ පිටුවහල් කරන ලද දරුවන්ගේ අයිතිවාසිකම් වෙනුවෙන් කතෝලික සභාව පෙනී සිටීමද මෙම දේශපාලන කණ්ඩායම්වල නොසතුටට හේතු වී තිබේ. පෙන්ටගනයේ දේව මෙහෙය අවලංගු කිරීම, පාප්තුමාගේ ප්රකාශවලට සහ කතෝලික පූජකවරුන් සංක්රමණික රැඳවුම් මධ්යස්ථාන තුළ සිදු කරන මැදිහත්වීම්වලට එරෙහිව එල්ල කළ සෘජු ප්රහාරයක් ලෙස බොහෝ දෙනා අර්ථකථනය කරති.
මෙම සිදුවීම ඇමරිකානු ක්රිස්තියානි ජාතිකවාදී සන්ධානය තුළ පවතින අභ්යන්තර බෙදීම් ප්රසිද්ධියට පත් කර ඇති අතර, එය උප ජනාධිපති ජේ.ඩී. වෑන්ස් වැනි ප්රමුඛ කතෝලික දේශපාලනඥයන්ටද බලපෑම් එල්ල කරනු ඇතැයි අපේක්ෂා කෙරේ. ඇතැම් පාර්ශව පෙන්වා දෙන්නේ මෙය අතීතයේ ඇමරිකානු සමාජයේ පැවති කතෝලික විරෝධී ආකල්ප නැවත කරළියට ගෙන ඒමේ උත්සාහයක් විය හැකි බවයි. ලෝකයේ බලවත්ම ආරක්ෂක මූලස්ථානය තුළ සිදුවූ මෙම ආගමික වෙනස, ඉදිරි ඇමරිකානු දේශපාලන ගමන්මග තුළ තීරණාත්මක සංවාද රැසකට මුලපුරනු නොඅනුමානය.
