අමෙරිකානු ආරක්ෂක ලේකම් පීට් හෙග්සෙත් (Pete Hegseth) යටතේ පවතින ආරක්ෂක දෙපාර්තමේන්තුව (Pentagon), 2025 මූල්ය වර්ෂය අවසානයේදී සිදු කර ඇති අතිවිශාල සහ සුඛෝපභෝගී වියදම් පිළිබඳව රජයේ නිරීක්ෂණ කණ්ඩායම් සහ දේශපාලනඥයන් දැඩි විවේචන එල්ල කර තිබේ. ‘Open the Books’ නම් ස්වාධීන ආයතනයක් සිදුකළ නවතම විශ්ලේෂණයකට අනුව, සැප්තැම්බර් මාසයේදී පමණක් ලොබ්ස්ටර් (Lobster) සහ කකුළුවන් සඳහා අමෙරිකානු ඩොලර් මිලියන 9කට අධික මුදලක් වැය කර ඇති බව හෙළි වී ඇත.
මෙම අධික වියදම් පද්ධතිය “Use-it-or-lose-it” (භාවිතා කරන්න නැතිනම් අහිමි කරගන්න) නම් ෆෙඩරල් අරමුදල් ප්රතිපත්තිය මත පදනම් වූවක් බව විචාරකයෝ පවසති. එනම්, වර්ෂය අවසානයේදී ඉතිරි වන මුදල් නැවත මහා භාණ්ඩාගාරයට යාම වැළැක්වීමට සහ මීළඟ වසරේ අයවැය කප්පාදු නොවීමට වගබලා ගැනීම සඳහා දෙපාර්තමේන්තු විසින් මෙවැනි අනවශ්ය වියදම් සිදු කරයි. ලොබ්ස්ටර්වලට අමතරව, සැප්තැම්බර් මාසයේදී රිබේ ස්ටීක් (Ribeye steak) සඳහා ඩොලර් මිලියන 15.1ක් ද, නව අයිස්ක්රීම් යන්ත්ර සඳහා ඩොලර් 124,000ක් සහ ඩෝනට්ස් (Doughnut) සඳහා ඩොලර් 139,224කට අධික මුදලක් ද වැය කර තිබේ.
මීට අමතරව, ගෘහ භාණ්ඩ සඳහා ඩොලර් මිලියන 225.6ක් වැය කර ඇති අතර, ඒ අතර ඩොලර් 12,540ක පලතුරු කූඩ රඳවනයන් සහ ඩොලර් 60,000කට අධික වටිනාකමකින් යුත් හර්මන් මිලර් (Herman Miller) සුවපහසු පුටු ද අඩංගු වේ. විශේෂයෙන්ම, ගුවන් හමුදා ප්රධානියාගේ නිවස සඳහා ඩොලර් ලක්ෂයක ස්ටේන්වේ (Steinway & Sons) පියානෝවක් මිලදී ගැනීම ද දැඩි කතාබහට ලක්ව තිබේ. ඩිමොක්රටික් සෙනෙට් සභික චක් ෂූමර් (Chuck Schumer) ඇතුළු පිරිස පෙන්වා දෙන්නේ ආරක්ෂක ලේකම්වරයා සැප්තැම්බර් මාසයේදී පමණක් වැය කර ඇති ඩොලර් බිලියන 93ක මුදල, අමෙරිකානුවන්ගේ සෞඛ්ය රක්ෂණ සහන වසර තුනක් සඳහා ලබා දීමට ප්රමාණවත් මුදලක් බවයි.
වත්මන් ඉරාන යුද්ධය සඳහා බිලියන ගණනින් බදු මුදල් වැය වෙමින් පවතින පසුබිමක, ආරක්ෂක දෙපාර්තමේන්තුවේ මෙවැනි සුඛෝපභෝගී සහ නාස්තිකාර වියදම් පිළිබඳව ඉදිරියේදී විශේෂ පරීක්ෂණයක් පවත්වන බව ඩිමොක්රටික් මන්ත්රීවරියක වන මෙලනි ස්ටැන්ස්බරි ද සඳහන් කර ඇත. ආරක්ෂක විභවතාවයන් ඉහළ නැංවීමට වඩා නාස්තිකාර වියදම් ප්රවර්ධනය කිරීම සම්බන්ධයෙන් පෙන්ටගනයට එල්ල වී ඇති මෙම චෝදනා ඉදිරි අමෙරිකානු අයවැය විවාදවලදී තීරණාත්මක වනු ඇත.
