පර්සියානු ගල්ෆ් කලාපයේ රටවල් කිහිපයක් ඉලක්ක කර ගනිමින් අද (09) උදෑසන එල්ල වූ දැවැන්ත ඩ්රෝන සහ මිසයිල ප්රහාර මාලාවක් හේතුවෙන් කලාපීය යුදමය නොසන්සුන්තාවය උපරිම මට්ටමකට වර්ධනය වී තිබේ. ඉරානය විසින් දියත් කරන ලද මෙම ප්රහාරවලින් බහරේනය, එක්සත් අරාබි එමීර් රාජ්යය සහ කුවේටය යන රටවලට සෘජු බලපෑම් එල්ල වී ඇති බව ජාත්යන්තර මාධ්ය වාර්තා කරයි.
බහරේනයේ අගනුවරට දකුණු දෙසින් පිහිටි සිට්රා (Sitra) ප්රදේශයේ බලශක්ති යටිතල පහසුකම් සහ සිවිල් පදිංචි ප්රදේශ ඉලක්ක කර එල්ල වූ ඩ්රෝන ප්රහාරවලින් පුද්ගලයින් 32 දෙනෙකු තුවාල ලබා ඇති බව එරට ජාතික සන්නිවේදන මධ්යස්ථානය තහවුරු කරයි. තුවාල ලැබූවන් අතර මාස 2ක බිළිඳකු සහ 17 හැවිරිදි දැරියක ද වන අතර, සිව් දෙනෙකුගේ තත්ත්වය බරපතල බව වාර්තා වේ.
මේ අතර, එක්සත් අරාබි එමීර් රාජ්යයේ අබුඩාබි අගනුවර අද උදෑසන ප්රබල පිපිරුම් හඬවල් කිහිපයකින් දෙදරුම් කා ඇති අතර, එය යුද්ධය ආරම්භ වූ දා සිට ඇසුණු ප්රබලම ශබ්ද බව විදෙස් මාධ්ය කණ්ඩායම් පවසයි. එරට ගුවන් ආරක්ෂක පද්ධති (Air Defense Systems) ක්රියාත්මක වී එල්ල වූ මිසයිල තර්ජන මැඩපැවැත්වීමට කටයුතු කර ඇති බව ආපදා කළමනාකරණ අධිකාරිය නිවේදනය කළේය.
කුවේටයේ ද ආරක්ෂිත කලාපයකට ඇතුළු වූ ඩ්රෝන යානයක් එරට ජාතික ආරක්ෂක බලකාය විසින් වෙඩි තබා බිම හෙළා ඇති අතර, වැදගත් ස්ථානවල ආරක්ෂාව තහවුරු කිරීමට ආරක්ෂක අංශ පියවර ගෙන තිබේ. මෙම ප්රහාර මාලාවත් සමඟ ගෝලීය බලශක්ති සැපයුමට සහ කලාපීය ස්ථාවරත්වයට එල්ල වී ඇත්තේ දැඩි තර්ජනයකි.
