ඉරාන-ඇමෙරිකානු යුදමය වාතාවරණය හේතුවෙන් ගෝලීය බලශක්ති සැපයුමට එල්ල වී ඇති බාධා සැලකිල්ලට ගනිමින් පිලිපීන ජනාධිපති ෆර්ඩිනන්ඩ් මාකෝස් ජූනියර් මහතා එරට තුළ “ජාතික බලශක්ති හදිසි අවස්ථාවක්” (National Energy Emergency) ප්රකාශයට පත් කර තිබේ. මැදපෙරදිග කලාපයේ පවතින ගැටුම්කාරී තත්ත්වය හමුවේ පිලිපීනයේ බලශක්ති සුරක්ෂිතතාවයට එල්ල වී ඇති “සන්නිහිත අනතුර” පාලනය කිරීම සඳහා මෙම පියවර ගත් බව ජනාධිපතිවරයා අවධාරණය කළේය. වසරක කාලයක් පුරා බලාත්මක වන මෙම හදිසි අවස්ථාව හරහා ඉන්ධන තොග රැස්කර තැබීම, මිල පාලනය කිරීම සහ අත්යවශ්ය භාණ්ඩ සැපයුම විධිමත් කිරීම සඳහා රජයට විශේෂ බලතල හිමි වේ.
විශේෂයෙන්ම ඉන්ධන මිල ඉහළ යාමට එරෙහිව පිලිපීනයේ ප්රවාහන අංශයේ වෘත්තීය සමිති ලබන බ්රහස්පතින්දා සිට දින දෙකක වැඩවර්ජනයක් සැලසුම් කර ඇති පසුබිමක මෙම ප්රකාශය නිකුත් වී ඇත. පිලිපීන බලශක්ති අමාත්යාංශය සඳහන් කරන්නේ වත්මන් පරිභෝජන මට්ටම අනුව රට සතුව පවතින්නේ තවත් දින 45කට ප්රමාණවත් ඉන්ධන තොග පමණක් බවයි. මෙම තත්ත්වය කළමනාකරණය කරගැනීම සඳහා අග්නිදිග ආසියානු කලාපයෙන් සහ වෙනත් රටවලින් බොරතෙල් බැරල් මිලියනයක් මිලදී ගැනීමට රජය උත්සාහ කරමින් සිටින අතර, අමෙරිකානු සම්බාධක පනවා ඇති රටවලින් පවා සහනදායී මිලට ඉන්ධන ලබාගැනීමට අවශ්ය රාජ්ය තාන්ත්රික අවසරය ලබාගැනීමට පිලිපීනය මේ වන විට අමෙරිකාව සමඟ සාකච්ඡා පවත්වමින් සිටී.
කෙසේ වෙතත්, එරට විපක්ෂ කණ්ඩායම් සහ වෘත්තීය සමිති චෝදනා කරන්නේ මෙම හදිසි අවස්ථාව ප්රකාශ කිරීම ප්රශ්නයට විසඳුමක් නොවන බවත්, වහාම ක්රියාත්මක වන පරිදි ඉන්ධන සඳහා පනවා ඇති බදු ඉවත් කර ජනතාවට සහන සැලසිය යුතු බවත්ය. පවතින උද්ධමනය හමුවේ පීඩාවට පත් ප්රවාහන සේවකයින් සඳහා පිලිපීන රජය මේ වන විට පෙසෝ 5,000ක (ඩොලර් 83ක) මූල්ය සහනාධාරයක් ලබාදීම ආරම්භ කර ඇති අතර, ඇතැම් නගරවල සිසුන්ට සහ සේවකයින්ට නොමිලේ බස් රථ පහසුකම් ලබාදීමට ද පියවර ගෙන තිබේ. මැදපෙරදිග යුද්ධයේ බලපෑම ආසියානු කලාපයේ රටවල් වෙත දැඩි ලෙස දැනෙන්නට පටන් ගෙන ඇති බව පිලිපීනයේ මෙම තීරණයෙන් මැනවින් පැහැදිලි වේ.
