මැදපෙරදිග යුදමය වාතාවරණය හමුවේ ඉන්ධන පිරිවැය දරාගත නොහැකි ලෙස ඉහළ යාමට එරෙහිව පිලිපීනයේ මැනිලා අගනුවර ප්රවාහන සේවකයින් සිය ගණනක් අද දැවැන්ත වැඩ වර්ජනයක් ආරම්භ කර තිබේ. බීබීසී පුවත් සේවය වාර්තා කරන පරිදි පසුගිය පෙබරවාරි 28 වනදා සිට මේ දක්වා පිලිපීනය තුළ ඩීසල් සහ පෙට්රල් මිල දෙගුණයකට වඩා වැඩි වී ඇති අතර මේ හේතුවෙන් එරට තුළ ජාතික බලශක්ති හදිසි තත්ත්වයක් ප්රකාශයට පත් කර ඇත. පිස්ටන් නමැති ප්රවාහන වෘත්තීය සමිති සන්ධානය විසින් මෙහෙයවනු ලබන මෙම වර්ජනය හරහා ඉන්ධන බදු ඉවත් කිරීම සහ තෙල් මිල පාලනය කිරීම ඇතුළු ඉල්ලීම් කිහිපයක් රජය වෙත ඉදිරිපත් කර තිබේ.
අද උදෑසන අගනුවර පුරා රැස්වූ විරෝධතාකරුවන් අතර කුඩා බස් රථ සහ ජීප් රථ රියදුරන් මෙන්ම යතුරුපැදි සහ මෝටර් රථ රියදුරන් ද විශාල වශයෙන් සිටින බව වාර්තා වේ. මොවුන් ප්රවාහන ගාස්තු සහ වැටුප් වැඩි කරන ලෙස රජයට බලපෑම් කරන අතර රජය විසින් පොරොන්දු වූ මූල්ය ආධාර නිසි පරිදි තමන්ට නොලැබෙන බවට ද චෝදනා නගති. රජයෙන් ලැබීමට නියමිතව තිබූ පෙසෝ 5,000 ක දීමනාව ලබා ගැනීමට පැය ගණනාවක් පෝලිම්වල රැඳී සිටියද බොහෝ දෙනෙකුට එම සහනය අහිමි වී ඇති බව විරෝධතාකරුවෝ පවසති.
බීබීසී පුවත් සේවය සමඟ අදහස් දැක්වූ 62 හැවිරිදි රියදුරෙකු වන ගිලර්මෝ ජැපෝල් කියා සිටියේ තම පවුල නඩත්තු කිරීමට ආහාර පවා නොමැති තත්ත්වයක් උදා වී ඇති බවයි. මේ අතර පිලිපීන ජනාධිපති ෆර්ඩිනන්ඩ් මාකෝස් ප්රකාශ කර ඇත්තේ පවතින බලශක්ති අර්බුදයට විසඳුම් සෙවීම සඳහා නව තෙල් ප්රභවයන් සොයා ගැනීමට රජය උපරිම උත්සාහයක නිරත වන බවයි. කෙසේ වෙතත් වර්ජනය හේතුවෙන් මැනිලා අගනුවර පොදු ප්රවාහන සේවය දැඩි ලෙස අඩාල වී ඇති අතර ජනතාව දැඩි අපහසුතාවයට පත්ව සිටිති.
