දිට්වා සුළි කුණාටුවෙන් පීඩාවට පත් මධ්යම පළාතේ පාසල් සිසුන්ට සහන සලසන බව පවසමින්, බලශක්ති අමාත්යවරයා ලෙස ව්යාජව පෙනී සිටිමින් ආධාර මුදල් රැස්කළ සැකකරුවන් වහාම අත්අඩංගුවට ගන්නා ලෙස කොටුව මහෙස්ත්රාත් ඉසුරු නෙත්තිකුමාර මහතා ඊයේ (17) නියෝග කළේය. රජයේ ඉහළ පෙළේ අමාත්යවරයෙකුගේ නාමය සහ ව්යාජ ලේඛන භාවිත කරමින් සිදුකර ඇති මෙම මහා පරිමාණ වංචාව සම්බන්ධයෙන් පූර්ණ විමර්ශනයක් පවත්වන ලෙස කොළඹ මධ්යම අපරාධ කොට්ඨාසයට දැනුම් දී තිබේ.
විමර්ශන නිලධාරීන් අධිකරණයෙන් කළ ඉල්ලීමකට අනුව, මෙම ජාවාරමට සම්බන්ධ දුරකථන අංකවල විශ්ලේඛන වාර්තා ලබාදෙන ලෙස මහෙස්ත්රාත්වරයා දුරකථන සමාගම් කිහිපයකට නියෝග කර ඇත. ස්වභාවික ආපදාවකින් විපතට පත් දරුවන්ගේ නාමය භාවිත කරමින් මහජනයා සහ විවිධ ආයතන නොමඟ යවා මුදල් වංචා කිරීම බරපතළ අපරාධයක් ලෙස අධිකරණයේදී සැලකිල්ලට ගැනිණි.
කොළඹ මධ්යම අපරාධ කොට්ඨාසය විසින් ඉදිරිපත් කළ මූලික වාර්තා සලකා බැලීමෙන් අනතුරුව, සැකකරුවන් හඳුනාගෙන අධිකරණයට ඉදිරිපත් කිරීමට අවශ්ය සියලු නීතිමය පහසුකම් සලසා දීමට මහෙස්ත්රාත්වරයා පියවර ගෙන තිබේ. මෙවැනි ආපදා අවස්ථාවලදී පුද්ගලික ගිණුම්වලට හෝ නිල නොවන පාර්ශ්වයන්ට ආධාර ලබාදීමේදී වඩාත් සැලකිලිමත් වන ලෙස ආරක්ෂක අංශ මහජනයාගෙන් ඉල්ලා සිටී.
