පාතාල කල්ලි නායක ‘කරන්දෙණියේ සුද්දා’ නමැත්තාට අයත් බව කියන රුපියල් කෝටි 50කට අධික වටිනාකමකින් යුත් මත්ද්රව්ය ගබඩාවක් අම්බලංගොඩ ප්රදේශයේදී වැටලීමට අහුංගල්ල පොලිසිය සමත් වී තිබේ. විදේශ රටවල සිට මුහුදු මාර්ගයෙන් මෙරටට ගෙන්වන මත්ද්රව්ය තොග දකුණු පළාත පුරා බෙදාහැරීමේ ප්රධාන මධ්යස්ථානය ලෙස මෙම නිවස භාවිත කර ඇති බව පොලිස් විමර්ශනවලින් අනාවරණය වී ඇත. අත්අඩංගුවට ගත් පිරිස අතර යුද හමුදා බුද්ධි අංශයේ හිටපු සෙබළකු, මත්ද්රව්ය ජාවාරම්කරුවන් දෙදෙනෙකු සහ කාන්තාවක ද සිටින බව පොලිසිය පවසයි.
මෙම දැවැන්ත ජාලය හෙළි කර ගැනීමට හැකි වී ඇත්තේ බලපිටිය මාරගස් දෙක ප්රදේශයේදී යතුරුපැදියකින් අයිස් මත්ද්රව්ය කිලෝවක් ප්රවාහනය කරමින් සිටි ජාවාරම්කරුවෙකු අත්අඩංගුවට ගෙන සිදුකළ ප්රශ්න කිරීම්වලදීය. ඔහුගේ ජංගම දුරකථනයේ තිබූ මත්ද්රව්ය පාර්සල්වල ඡායාරූප ඔස්සේ සිදුකළ විමර්ශනවලදී අම්බලංගොඩ පිහිටි මෙම රහසිගත ගබඩාව පිළිබඳ තොරතුරු අනාවරණය විය. පොලිසිය අදාළ නිවස වටලන අවස්ථාවේදී කාන්තාවක විසින් ත්රිරෝද රථයක් වෙත මත්ද්රව්ය බෑගයක් ලබාදෙමින් සිට ඇති අතර, එම බෑගයේ සහ ත්රිරෝද රථයේ තිබී හෙරොයින් කිලෝ 12ක් සහ අයිස් මත්ද්රව්ය කිලෝ 13ක් සොයා ගැනීමට හැකි වී තිබේ.
අත්අඩංගුවට ගත් හිටපු යුද හමුදා බුද්ධි සෙබළා කරන්දෙණියේ සුද්දාගේ අවි ආයුධ සහ මත්ද්රව්ය ජාලයේ ප්රධාන මෙහෙයුම්කරුවෙකු ලෙස කටයුතු කර ඇති බවට හෙළි වී ඇත. වැටලීමේදී මත්ද්රව්යවලට අමතරව පිස්තෝල ජීව උණ්ඩ 60ක් ද පොලිස් භාරයට ගෙන ඇති අතර, ඒවා කිසියම් ප්රහාරයක් සඳහා රැගෙන යාමට සූදානම් කර තිබූ ඒවා බවට සැක කෙරේ. දකුණු පළාත භාර ජ්යෙෂ්ඨ නියෝජ්ය පොලිස්පති කිත්සිරි ජයලත් මහතාගේ උපදෙස් මත අහුංගල්ල පොලිස් ස්ථානාධිපති අමිත් ජයමහ මහතා ඇතුළු කණ්ඩායමක් සැකකරුවන් රඳවා තබාගෙන වැඩිදුර විමර්ශන සිදුකරති.
