ඉන්දීය අග්රාමාත්ය නරේන්ද්ර මෝදි මහතාගේ විශේෂ ආරාධනයකට අනුව නවදිල්ලි නුවර පැවැත්වෙන ‘AI Impact Summit 2026’ (කෘත්රිම බුද්ධි බලපෑම් පිළිබඳ සමුළුව) සඳහා සහභාගී වීමට ජනාධිපති අනුර කුමාර දිසානායක මහතා ඊයේ (17) පස්වරුවේ ඉන්දියාවේ ඉන්දිරා ගාන්ධි ජාත්යන්තර ගුවන් තොටුපොළ වෙත ළඟා විය. ගුවන් තොටුපොළේදී ජනාධිපතිවරයාව ඉන්දීය රාජ්ය අමාත්ය ශ්රී රාජ් භූෂන් චෞද්රි (Shri Raj Bhushan Choudhary) මහතා ඇතුළු ඉහළ පෙළේ නියෝජිත පිරිසක් විසින් ඉතා උණුසුම් අයුරින් පිළිගනු ලැබූහ. මානව වර්ගයාගේ යහපත උදෙසා කෘත්රිම බුද්ධිය වගකීම් සහගත ලෙස භාවිතා කිරීමේ අරමුණින් පවත්වනු ලබන මෙම සමුළුවට රටවල් 20 ක රාජ්ය නායකයන් ඇතුළු නියෝජිතයන් 45 කට අධික පිරිසක් සහභාගී වීමට නියමිතය.
ජනාධිපතිවරයා මෙම සමුළුව අමතා සිය විශේෂ දේශනය හෙට එනම් පෙබරවාරි 19 වනදා පවත්වනු ලබන අතර එහිදී ශ්රී ලංකාවේ ඩිජිටල් පරිවර්තනය සහ කෘත්රිම බුද්ධිය සම්බන්ධයෙන් වන අනාගත දැක්ම ඉදිරිපත් කිරීමට නියමිතව ඇත. මෙම සංචාරය අතරතුර ජනාධිපති අනුර කුමාර දිසානායක මහතා ඉන්දීය අග්රාමාත්ය නරේන්ද්ර මෝදි මහතා සමඟ ද්විපාර්ශ්වික සාකච්ඡා පැවැත්වීමට ද සැලසුම් කර තිබේ. මෙම සාකච්ඡා මූලික වශයෙන් දෙරට අතර ඩිජිටල් සහයෝගීතාව, ආර්ථික සම්බන්ධතා සහ නැගී එන තාක්ෂණයන් පිළිබඳව අවධානය යොමු කරනු ඇත.
මෙම සංචාරය සඳහා ජනාධිපතිවරයා සමඟ ඩිජිටල් ආර්ථිකය පිළිබඳ ජනාධිපති ජ්යෙෂ්ඨ උපදේශක ආචාර්ය හාන්ස් විජේසූරිය සහ ඩිජිටල් ආර්ථික අමාත්යාංශයේ ලේකම් වරුණ ශ්රී ධනපාල යන මහත්වරුන් ද එක්ව සිටිති. මෙය දකුණු ආසියානු කලාපය තුළ කෘත්රිම බුද්ධිය සම්බන්ධයෙන් පවත්වනු ලබන ප්රමුඛතම සමුළුවක් වන අතර, ශ්රී ලංකාව ගෝලීය තාක්ෂණික ප්රවණතා සමඟ සමපාත වීමට මෙම සංචාරය විශාල රුකුලක් වනු ඇතැයි අපේක්ෂා කෙරේ.
