ආහාර සුරක්ෂිතතාව යනු රටක ජාතික ආරක්ෂාව මෙන්ම පුරවැසියාගේ ආරක්ෂාව පිළිබඳ තීරණාත්මක සාධකයක් බව ජනාධිපති අනුර කුමාර දිසානායක මහතා අවධාරණය කරයි. පසුගියදා අනුරාධපුරයේදී පැවැති ‘හිමිකම’ නිදහස් ප්රදාන පත්ර පිළිගැන්වීමේ ජාතික වැඩසටහන අමතමින් ජනාධිපතිවරයා කියා සිටියේ, කොවිඩ් වසංගතය හරහා ලෝකයටම උගන්වා ඇති එම පාඩම සැලකිල්ලට ගනිමින් නව ආර්ථික උපායමාර්ගවලට අනුරූප වන පරිදි ඉඩම් නිදහස් කිරීමේ විධිමත් වැඩපිළිවෙළක් රජය ක්රියාත්මක කරන බවයි.
මෙම වැඩසටහන යටතේ 1935 ඉඩම් සංවර්ධන ආඥා පනතේ කොන්දේසිවලට යටත්ව තිබූ අවසරපත්ර සහ දීමනාපත්ර වෙනුවට, පූර්ණ අයිතිය සහිත ‘හිමිකම’ නිදහස් ප්රදාන පත්ර ජනතාවට ලබාදීම සිදු කෙරේ. මෙහිදී අනුරාධපුර දිස්ත්රික්කයේ ප්රතිලාභීන් 500ක් සඳහා හිමිකම් පත්ර බෙදා දීම සංකේතාත්මකව ආරම්භ කෙරුණු අතර, ජනතාව තමන්ට ලැබෙන පරම අයිතිය සහිත මෙම ඉඩම් මතු පරපුර වෙනුවෙන් සුරක්ෂිතව තබා ගත යුතු බවත්, ඒවා විකුණා නොදමන ලෙසත් ජනාධිපතිවරයා ජනතාවගෙන් ඉල්ලීමක් කළේය.
රටේ අනාගතය වෙනුවෙන් විද්යාත්මක සහ දත්ත මත පදනම් වූ නව ඉඩම් පරිහරණ සැලැස්මක අවශ්යතාව ජනාධිපතිවරයා මෙහිදී පෙන්වා දුන්නේය. විශේෂයෙන්ම 21 වන සියවසේ තාක්ෂණික දියුණුවට ගැලපෙන පරිදි AI මධ්යස්ථාන සහ හරිත බලශක්ති උද්යාන වැනි නවීන ආර්ථික ව්යාපෘති සඳහා ඉඩම් වෙන් කළ යුතු බවත්, පැරණි උරුම ආර්ථිකයකට පමණක් ඉඩම් කොටු කර තැබීම ප්රායෝගික නොවන බවත් ඔහු පැවසීය. දුප්පත්කම නැමැති සමාජ ඛේදවාචකය අවසන් කර ග්රාමීය ජනතාව ආර්ථිකයේ සැබෑ හවුල්කරුවන් බවට පත් කිරීම රජයේ ප්රධාන ඉලක්කය බව ද ජනාධිපතිවරයා මෙහිදී වැඩිදුරටත් සඳහන් කළේය.
