ශ්රී ලංකා භූමිය, මුහුදු කලාපය මෙන්ම ගුවන් කලාපයන් කිසිසේත්ම රාජ්යයන් අතර ගැටුමකදී පක්ෂපාතී ආකාරයට හෝ කවර හෝ පාර්ශවයකට පීඩාවක් ගෙන දෙන ආකාරයෙන් යොදා ගැනීමට ඉඩ නොදෙන බව ජනාධිපති අනුර කුමාර දිසානායක මහතා අවධාරණය කරයි. ඉරාන නෞකාවන් සම්බන්ධයෙන් මතුව ඇති තත්ත්වය පිළිබඳව විශේෂ මාධ්ය හමුවක් පවත්වමින් ජනාධිපතිවරයා කියා සිටියේ, ලංකාව ජාතියක් මෙන්ම රාජ්යයක් ලෙස මධ්යස්ථභාවය ආරක්ෂා කරන අතරම මනුෂ්යත්වය සැමවිටම අංක එකෙහි තබා ක්රියා කරන බවයි. ඒ අනුව අදාළ ඉරාන නෞකාව ශ්රී ලංකා රජය භාරයට ගෙන ත්රිකුණාමලය වරාය වෙත රැගෙන යාමට පියවර ගෙන තිබේ.
මෙම නෞකාව ආපදාවට ලක්වූ අවස්ථාවේ සිට ශ්රී ලංකා නාවික හමුදාව සහ ගුවන් හමුදාව එක්ව සිදුකළ මෙහෙයුමකින් පුද්ගලයන් 32 දෙනෙකු මුදාගත් අතර මළ සිරුරු 84ක් ද ගොඩබිමට රැගෙනවිත් ඇත. දැනට නෞකාවේ සිටින නිලධාරීන්, කැඩෙට් නිලධාරීන් ඇතුළු 208 දෙනෙකුගෙන් යුත් සමස්ත පිරිස කොළඹ වරාය හරහා ගොඩබිමට රැගෙනවිත් වැලිසර නාවික හමුදා කඳවුරේ වෛද්ය පරීක්ෂණ සඳහා යොමු කිරීමට නියමිතය. ජාත්යන්තර දේශපාලන බලපෑම් හමුවේ වුවද මානුෂීය වගකීම සහ රටේ ස්වාධීනත්වය ආරක්ෂා කරමින් මධ්යස්ථ ප්රතිපත්තියක රජය රැඳී සිටින බවත්, පවතින ලෝක යුද වාතාවරණය හමුවේ වුවද මෙරට ආර්ථිකයට හෝ ඉන්ධන සැපයුමට බාධාවක් නොවීමට අවශ්ය සියලු පියවර ගෙන ඇති බවත් ජනාධිපතිවරයා වැඩිදුරටත් සහතික කර සිටියේය.
