කෘත්රිම බුද්ධිය (AI) මානව වර්ගයාගේ යහපත උදෙසා වගකීම් සහගතව භාවිත කරමින්, කිසිවෙකු කොන් නොවන සාමූහික අනාගතයක් ගොඩනැඟීමට ශ්රී ලංකාව කැපවී සිටින බව ජනාධිපති අනුර කුමාර දිසානායක මහතා පවසයි. ඉන්දියාවේ නවදිල්ලි නුවර අද (19) ආරම්භ වූ ‘AI Impact 2026’ සමුළුවේ රාජ්ය නායක සැසිය අමතමින් ජනාධිපතිවරයා මේ බව අවධාරණය කළේය. ඉන්දීය අග්රාමාත්ය නරේන්ද්ර මෝදිගේ ප්රධානත්වයෙන් පැවැති මෙම සමුළුවට ප්රංශ ජනාධිපති එමානුවෙල් මැක්රොන් ඇතුළු ලෝක නායකයන් රැසක් එක්ව සිටියහ.
AI තාක්ෂණය හුදකලා ජයග්රහණයක් නොව ආර්ථික හා සංස්කෘතික සහයෝගීතාවයේ නව මානයක් ලෙස ශ්රී ලංකාව දකින බව පෙන්වා දුන් ජනාධිපතිවරයා, ඒ වෙනුවෙන් කරුණු හතරක් මත පදනම් වූ කලාපීය සහයෝගීතාවක් යෝජනා කළේය. තාක්ෂණය අඩු වියදමකින් ලබාගත හැකි වීම, දේශීය භාෂා දත්ත කට්ටල නිර්මාණය, පොදු ආරක්ෂක මෙවලම් ස්ථාපිත කිරීම සහ ඒකාබද්ධ ධාරිතා සංවර්ධනය එම කරුණු වේ. විශේෂයෙන්ම AI තාක්ෂණය භාෂා කිහිපයකට පමණක් සීමා වුවහොත් දේශීය සංස්කෘතික විවිධත්වය ගිලිහී යා හැකි බවත්, එබැවින් දේශීය භාෂා මෙම පද්ධති තුළට බද්ධ කිරීම අත්යවශ්ය බවත් ඔහු පෙන්වා දුන්නේය. ඉන්දියාව වැනි රටවල් සමඟ එක්ව කලාපීය AI දත්ත මධ්යස්ථාන ස්ථාපිත කිරීමේ විභවයක් පවතින බව ද ජනාධිපතිවරයා මෙහිදී වැඩිදුරටත් සඳහන් කළේය.
