ලෝක බාලදක්ෂ ව්යාපාරයේ නිර්මාතෘ රොබට් බේඩන් පවෙල් සාමිවරයාගේ 169 වන ජන්ම දින සැමරුම සහ ලෝක බාලදක්ෂ චින්තන දින උත්සවය අග්රාමාත්ය ආචාර්ය හරිනි අමරසූරිය මහත්මියගේ ප්රධානත්වයෙන් පසුගිය පෙබරවාරි 22 වන දින ජාතික බාලදක්ෂ මූලස්ථානයේදී පැවැත්විණි. මෙහිදී අදහස් දැක්වූ අග්රාමාත්යතුමිය අවධාරණය කළේ බාලදක්ෂ ව්යාපාරය යනු හුදෙක් තනතුරු දැරීමක් නොව, “සූදානම්ව සිටිමින්” අන් අයට උපකාර කිරීමට සහ සමාජයට සේවය කිරීමට පුද්ගලයෙකු හැඩගස්වන උදාර පුහුණුවක් බවයි.
නූතන තාක්ෂණය ඵලදායී ලෙස භාවිතා කරමින්, අන් අයට ගරු කරන විනයගරුක සහ බුද්ධිමත් “ස්මාර්ට්” (Smart) බාලදක්ෂයෙකු ලෙස සමාජයට සේවය කිරීමේ වැදගත්කම ඇය මෙහිදී පෙන්වා දුන්නාය. එමෙන්ම ගස් සිටුවීම සහ ජල සම්පත් සුරැකීම වැනි පරිසර හිතකාමී මුලපිරීම් හරහා රටේ අනාගතය සුරක්ෂිත කිරීමට වගකීමෙන් යුතුව දායක වන ලෙස අග්රාමාත්යතුමිය බාලදක්ෂයින්ගෙන් ඉල්ලා සිටියාය.
මෙම උත්සවයට සමගාමීව බාලදක්ෂ ඩිජිටල්කරණ ව්යාපෘතිය යටතේ දිස්ත්රික්ක කිහිපයක් සඳහා ලැප්ටොප් පරිගණක සහ ප්රථමාධාර කට්ටල බෙදා දීම සංකේතාත්මකව සිදු කෙරිණි. ප්රධාන බාලදක්ෂ කොමසාරිස් නීතිඥ මනෝජ් නානායක්කාර මහතා විසින් අග්රාමාත්යතුමිය වෙත විශේෂ බාලදක්ෂ මුද්දර එකතුවක් සහ සමරු කවරයක් ද පිළිගන්වන ලදී. මෙම අවස්ථාවට අග්රාමාත්ය ලේකම් ප්රදීප් සපුතන්ත්රි මහතා, ශ්රී ලංකා බාලදක්ෂ සංගමයේ නිලධාරීන් සහ දිවයින පුරා විසිරී සිටින බාලදක්ෂයින් විශාල පිරිසක් සහභාගී වූහ.
