පෞද්ගලික බස් රථ ධාවනයෙන් ඉවත් වීමට අද (23) ගත් තීරණය කිසිසේත්ම වර්ජනයක් නොවන බව ලංකා පෞද්ගලික බස් හිමියන්ගේ සංගමයේ සභාපති ගැමුණු විජේරත්න මහතා පවසයි. ඉන්ධන මිල ශීඝ්රයෙන් ඉහළ යාම හමුවේ පැරණි බස් ගාස්තු යටතේ ධාවනය කිරීමෙන් දිනකට රුපියල් 5,000 සිට 20,000 දක්වා විශාල පාඩුවක් සිදුවන බැවින්, ව්යාපාරික මට්ටමින් තවදුරටත් බස් රථ ධාවනය කළ නොහැකි තත්ත්වයක් උදාවී ඇති බව ඔහු පෙන්වා දුන්නේය. රජයට ඊයේ දිනයේ සිටම නව ගාස්තු සංශෝධනය ක්රියාත්මක කිරීමට හැකියාව තිබුණද, බලධාරීන් ඒ පිළිබඳ නිසි පියවර නොගැනීම මෙම තත්ත්වයට සෘජුවම බලපෑ බව ඒ මහතා වැඩිදුරටත් සඳහන් කළේය.
අද දිනයේ දිවයිනේ පෞද්ගලික බස් රථවලින් 90%කට වඩා වැඩි ප්රමාණයක් ධාවනයෙන් ඉවත් වී ඇති බවත්, මෙය කිසිදු බලපෑමකින් තොරව බස් හිමියන් ස්වේච්ඡාවෙන් ගත් තීරණයක් බවත් ඔහු පැවසීය. කෙසේ වෙතත්, පාසල් සිසුන් වෙනුවෙන් ක්රියාත්මක වන ‘සිසු සැරිය’ බස් රථ සේවාව අඛණ්ඩව ක්රියාත්මක කරන ලෙස තමන් උපදෙස් දී ඇති බව ද ඔහු සහතික විය. ප්රවාහන අමාත්යාංශය සහ ජාතික ගමනාගමන කොමිෂන් සභාව තමන් සමඟ නිසි සාකච්ඡාවකින් තොරව කටයුතු කිරීම පිළිබඳව විරෝධය පළ කළ විජේරත්න මහතා, මෙය රජයට ලබා දුන් “සංඥාවක්” බවත්, සාකච්ඡා මාර්ගයෙන් ගැටලු විසඳා ගැනීමට රජය වහා මැදිහත් විය යුතු බවත් අවධාරණය කළේය.
