ලංකා ගමනාගමන මණ්ඩලයට අයත් ඩිපෝ මඟින් පමණක් ඉන්ධන ලබාදීමේ වත්මන් ක්රමවේදය හේතුවෙන්, දෛනිකව ධාවනය වන පෞද්ගලික බස් රථ සංඛ්යාව 50% දක්වා සීමා වීමේ දැඩි අවදානමක් පවතින බව ලංකා පෞද්ගලික බස් හිමියන්ගේ සංගමයේ සභාපති ගැමුණු විජේරත්න මහතා අනතුරු අඟවයි. අද පස්වරුවේ මාධ්ය වෙත අදහස් දක්වමින් ඔහු පෙන්වා දුන්නේ මෙම ක්රමය යටතේ දිවයින පුරා පවතින පෞද්ගලික බස් රථ 13,000න් ධාවනය කළ හැක්කේ බස් රථ 6,500ක් වැනි ප්රමාණයක් පමණක් බවයි.
පෞද්ගලික බස් රථ සඳහා ඉන්ධන ලබාගැනීමේදී දැනට මුහුණ දීමට සිදුව ඇති ප්රධාන ගැටලු කිහිපයක් ගැමුණු විජේරත්න මහතා මෙහිදී විස්තර කළේය. ලංගම ඩිපෝ දෛනිකව සවස 5.00ට වසා දැමීම නිසා දවසේ ධාවන කටයුතු නිමවා රාත්රී කාලයේ ඉන්ධන ලබාගැනීමට බස් රථවලට ඇති හැකියාව අහිමි වී තිබේ. මේ හේතුවෙන් පසුදින ධාවනය සඳහා ඉන්ධන ලබාගැනීමට බස් රථවලට පෝලිම්වල රැඳී සිටීමට සිදුවීමෙන් ධාවන වාර ගණනාවකට බාධා පැමිණෙන බව ඔහු පෙන්වා දෙයි. එමෙන්ම පවතින බස් රථ සංඛ්යාවට සාපේක්ෂව ඉන්ධන නිකුත් කරන ඩිපෝ සංඛ්යාව ප්රමාණවත් නොවීම නිසා දිගු පෝලිම් නිර්මාණය වී ඇති අතර අඩු ආදායම්ලාභී ජනතාවගේ ප්රධාන ප්රවාහන මාධ්යය වන පොදු ප්රවාහන සේවාව සඳහා රජය මීට වඩා ප්රමුඛතාවයක් ලබා දිය යුතු බව ඔහු අවධාරණය කළේය.
ගෝලීය වශයෙන් පවතින අර්බුදය තේරුම් ගත්තද ප්රවාහන පද්ධතිය කඩා වැටීම වැළැක්වීම සඳහා විධිමත් QR කේත ක්රමවේදයක් කඩිනමින් හඳුන්වා දීමේ අවශ්යතාවය ද ඔහු නැවතත් සිහිපත් කළේය. පොදු ප්රවාහන සේවාවට ප්රමුඛතාවය නොදුන්නහොත් එය රටේ සමස්ත ජන ජීවිතයටම බලපාන බරපතල ගැටලුවක් වනු ඇති බව ඔහුගේ අදහසයි.
