රජය විසින් හඳුන්වා දීමට නියමිත “ත්රස්තවාදයෙන් රාජ්යය ආරක්ෂා කිරීමේ පනත” (Protection of the State from Terrorism Act – PSTA) මෙරට ප්රජාතන්ත්රවාදී නිදහස සම්පූර්ණයෙන්ම අහිමි කරන භයානක නීතියක් බව හිටපු විදේශ අමාත්ය මහාචාර්ය ජී. එල්. පීරිස් මහතා පවසයි. ඊයේ (12) කොළඹදී පැවැති මාධ්ය හමුවකදී ඔහු මේ බව අවධාරණය කළේය.
මෙම පනත් කෙටුම්පත සම්බන්ධයෙන් ඔහු මතු කළ ප්රධාන කරුණු කිහිපයක් මෙසේය:
අපැහැදිලි නිර්වචන: ත්රස්තවාදය යනු කුමක්දැයි පැහැදිලි නිර්වචනයක් මෙහි නොමැති බවත්, ඒ වෙනුවට ප්රධාන කාණ්ඩ 13ක් යටතේ ඕනෑම ක්රියාවක් ත්රස්තවාදී වරදක් ලෙස අර්ථ දැක්වීමට ඉඩකඩ සලසා ඇති බවත් ඔහු පෙන්වා දෙයි. GSP+ සහ ආර්ථික බලපෑම: මෙම මර්දනකාරී නීති හේතුවෙන් යුරෝපා සංගමය විසින් ලබා දෙන GSP+ බදු සහනය ඇතුළු ජාත්යන්තර ආර්ථික වරප්රසාද අහිමි වීමේ දැඩි අවදානමක් පවතින බව ඔහු අනතුරු ඇඟවීය. විධායකයට අධික බලතල: ආරක්ෂක ලේකම්වරයාට වසරක් දක්වා රැඳවුම් නියෝග නිකුත් කිරීමට බලය ලැබීම, ඕනෑම ස්ථානයක් තහනම් කලාපයක් ලෙස ප්රකාශ කිරීමට ජනාධිපතිවරයාට හැකි වීම සහ සංවිධාන තහනම් කිරීමේ බලය විධායකය සතු වීම භයානක බව පීරිස් මහතා සඳහන් කළේය. දණ්ඩනය සහ මාධ්ය: වරදක් ඔප්පු වුවහොත් වසර 20ක සිරදඬුවම් නියම කළ හැකි අතර, අවසරයකින් තොරව ඡායාරූප හෝ වීඩියෝ ලබා ගැනීම පවා වසර 3ක සිරදඬුවම් ලැබිය හැකි වරදක් බවට පත් කර ඇත.
