බාල ගල්අඟුරු මෙරටට ආනයනය කිරීම හේතුවෙන් රජයට සිදුව ඇති දැවැන්ත මූල්ය අලාභය, වසර 40ක් පුරා මෙරට පාර්ලිමේන්තු මන්ත්රීවරුන්ගේ විශ්රාම වැටුප් ගෙවීම සඳහා වැයවන මුදලට සමාන බව පෙරටුගාමී සමාජවාදී පක්ෂය පවසයි. එම පක්ෂයේ අධ්යාපන ලේකම් පුබුදු ජයගොඩ මහතා ඊයේ (22) පැවැති ප්රවෘත්ති සාකච්ඡාවකදී මේ බව අනාවරණය කළේය.
නොරොච්චෝලේ ලක්විජය බලාගාරය සඳහා ඉන්දීය සමාගමක් හරහා ගෙන්වන ලද ගල්අඟුරු නියමිත ප්රමිතියෙන් තොර බවට තහවුරු වී ඇති අතර, මෙම ගනුදෙනුවේ පවතින දූෂිත ස්වභාවය වසා ගැනීමට රජය රසායනාගාර වාර්තා පවා වළක්වාලීමට උත්සාහ කළ බවට ඔහු චෝදනා කළේය. දැනට ආනයනය කර ඇති ගල්අඟුරු නැව් 8ක් සම්බන්ධයෙන් ලංකා විදුලිබල මණ්ඩලය විසින් පාර්ලිමේන්තු ආංශික අධීක්ෂණ කාරක සභාව වෙත යොමු කළ වාර්තාවකින් ද මෙම සෘජු මූල්ය අලාභය පිළිබඳ දත්ත ඉදිරිපත් කර ඇති බව වාර්තා වේ.
බාල ගල්අඟුරු භාවිතයෙන් විදුලිය උත්පාදනය කිරීමේදී බලාගාරයේ යන්ත්ර සූත්රවලට සිදුවන හානිය සහ අවම කාර්යක්ෂමතාව හේතුවෙන් සිදුවන පාඩුව රටේ ආර්ථිකයට දැරිය නොහැකි මට්ටමක පවතින බව ද මෙහිදී අවධාරණය කෙරිණි. මෙම සිදුවීම සම්බන්ධයෙන් වගකිවයුතු නිලධාරීන්ට සහ දේශපාලන අධිකාරියට එරෙහිව වහාම නීතිය ක්රියාත්මක කරන ලෙස විපක්ෂ ක්රියාකාරීහු රජයෙන් ඉල්ලා සිටිති.
