ව්යාජ ඔප්පු සකස් කර ඉඩම් අලෙවි කිරීමේ චෝදනාවට වරදකරු වූ ශ්රී ලංකා පොදුජන පෙරමුණේ පුත්තලම දිස්ත්රික් නීතිඥ සංගමයේ සභාපති නීතිඥ ඇලෙක්ස් නිශාන්ත ප්රනාන්දු මහතාට බරපතළ වැඩ සහිත වසර 10ක සිර දඬුවම් නියම කිරීමට හලාවත මහාධිකරණ විනිසුරු නයෝමි වික්රමසිංහ මහත්මිය අද (18) නියෝග කළාය. මෙම නඩු තීන්දුවට අදාළ සාරාංශගත කරුණු මෙසේය.
2011 වසරේදී අක්කර 03කට අධික ඉඩම් කොටස් දෙකක් සඳහා ව්යාජ ඔප්පු සකස් කර විකිණීම සම්බන්ධයෙන් මොහුට එරෙහිව චෝදනා එල්ල වී තිබූ අතර අපරාධ පරීක්ෂණ දෙපාර්තමේන්තුවේ වාණිජ අපරාධ විමර්ශන අංශය මගින් මේ පිළිබඳ පරීක්ෂණ මෙහෙයවා තිබුණි. එහිදී චෝදනා 03කට වරදකරු වූ නීතිඥවරයාට වසර 10ක සිර දඬුවමක්, රුපියල් ලක්ෂයක දඩයක් සහ පැමිණිලිකරුට රුපියල් ලක්ෂ 8ක වන්දියක් ගෙවන ලෙස අධිකරණය නියම කළේය. මෙම නඩුවේ පළමු විත්තිකරු වූ සමන් කුමාර නැමැත්තාට ද වසර 10ක සිර දඬුවම් සහ රුපියල් ලක්ෂ 8ක වන්දියක් නියම විය.
දඬුවම් නියම වූ ඇලෙක්ස් නිශාන්ත ප්රනාන්දු මහතා 2024 පාර්ලිමේන්තු මැතිවරණයේදී ශ්රී ලංකා පොදුජන පෙරමුණෙන් පුත්තලම දිස්ත්රික්කය සඳහා තරග කළ අපේක්ෂකයෙකු වන අතර ඔහු පොදුජන පෙරමුණේ පුත්තලම දිස්ත්රික් නීතිඥ සංගමයේ සභාපතිවරයා ලෙස ද කටයුතු කළේය. මෙම නීතිඥවරයාට එරෙහිව මෙවැනිම ව්යාජ ඔප්පු සකස් කිරීමේ චෝදනා යටතේ තවත් නඩු 25ක් අධිකරණයේ විභාග වෙමින් පවතින බව ද වාර්තා වේ.
