ඉරානය විසින් එල්ල කරන ලද මිසයිල ප්රහාර හේතුවෙන් කටාර් රාජ්යයේ ද්රව ස්වභාවික වායූ (LNG) අපනයන ධාරිතාවෙන් 17%ක් පමණ අක්රිය වී ඇති බව ‘QatarEnergy’ ආයතනයේ ප්රධාන විධායක නිලධාරී සාද් අල්-කාබි (Saad al-Kaabi) මහතා ප්රකාශ කළේය. මේ හේතුවෙන් කටාර් රාජ්යයට වසරකට ඩොලර් බිලියන 20ක පමණ දැවැන්ත ආදායමක් අහිමි වීමේ තර්ජනයක් මතුව තිබේ.
ඉරාන ප්රහාරවලින් කටාර්හි ‘රාස් ලැෆාන්’ (Ras Laffan) කාර්මික නගරයේ පිහිටි LNG නිෂ්පාදන ඒකක (Trains) දෙකකට සහ එක් GTL (Gas-to-Liquids) මධ්යස්ථානයකට දැඩි හානි සිදුව ඇත. මෙම හානි යථා තත්ත්වයට පත් කිරීම සඳහා වසර 3 සිට 5 දක්වා කාලයක් ගතවනු ඇතැයි ගණන් බලා ඇති අතර, එම කාලය තුළ වාර්ෂිකව මෙට්රික් ටොන් මිලියන 12.8ක නිෂ්පාදන ධාරිතාවක් අහිමි වනු ඇත.
කටාර් රාජ්යය විසින් ඉතාලිය, දකුණු කොරියාව, බෙල්ජියම සහ චීනය වැනි රටවල් සමඟ ඇති කරගෙන තිබූ දිගුකාලීන LNG සැපයුම් ගිවිසුම් සම්බන්ධයෙන් ‘අප්රතිහත බලය’ (Force Majeure) ප්රකාශ කිරීමට ද මේ වන විට පියවර ගෙන තිබේ. මෙයින් අදහස් වන්නේ පවතින තත්ත්වය හමුවේ අදාළ රටවලට නියමිත පරිදි බලශක්ති සැපයුම් ලබා දීමට කටාර් රාජ්යය අපොහොසත් වන බවයි.
