හිටපු ජනාධිපති රනිල් වික්රමසිංහ මහතා 2023 වසරේදී බ්රිතාන්යයේ වුල්වර්හැම්ප්ටන් (Wolverhampton) විශ්වවිද්යාලයේ සිදුකළ සංචාරයට අදාළව තොරතුරු විමසමින් අපරාධ පරීක්ෂණ දෙපාර්තමේන්තුව (CID) යොමු කළ ලිපිවලට මෙතෙක් කිසිදු ප්රතිචාරයක් ලැබී නොමැති බව වාර්තා වේ. මෙම මස මුලදී (පෙබරවාරි 4) CIDය විසින් විද්යුත් තැපෑල සහ ගුවන් තැපෑල මඟින් ප්රශ්න 9කින් යුත් ප්රශ්නාවලියක් එම විශ්වවිද්යාලය වෙත යොමු කර තිබුණි.
මෙම සංචාරය සඳහා රුපියල් මිලියන 16.6ක රජයේ මුදල් අවභාවිත කළ බවට එල්ල වී ඇති චෝදනාව මත හිටපු ජනාධිපතිවරයා පසුගිය 2025 අගෝස්තු මාසයේදී අත්අඩංගුවට ගනු ලැබූ අතර, දැනට ඔහු ඇප මත පසුවේ. මෙම නඩුවේ දෙවන විත්තිකරු වන හිටපු ජනාධිපති ලේකම් සමන් ඒකනායක මහතා කොටුව මහේස්ත්රාත් අධිකරණය විසින් එළඹෙන පෙබරවාරි 18 වන දා දක්වා යළි රක්ෂිත බන්ධනාගාරගත කිරීමට නියෝග කර ඇත.
විත්තිකාර සමන් ඒකනායක මහතා වෙනුවෙන් පෙනී සිටි ජනාධිපති නීතිඥ කාලිංග ඉන්දතිස්ස මහතා අධිකරණය හමුවේ කරුණු දක්වමින් කියා සිටියේ, මෙම සංචාරයේ වියදම් ඇස්තමේන්තු සකස් කර ඇත්තේ එවකට බ්රිතාන්යයේ ශ්රී ලංකා මහා කොමසාරිස් සරෝජා සිරිසේන මහත්මිය විසින් බවයි. එම ඇස්තමේන්තු සම්බන්ධයෙන් යම් ගැටලුවක් තිබුණේ නම් ඒවා ප්රතික්ෂේප කිරීමේ බලය විදේශ කටයුතු අමාත්යාංශයට තිබූ බව ද ඔහු අවධාරණය කළේය. මේ අතර, මීට පෙර අවස්ථාවකදී විශ්වවිද්යාලය ප්රකාශ කර තිබුණේ මෙය නිල ආරාධනයක් බව වුවද, CIDය උත්සාහ කරන්නේ එය රාජ්ය තාන්ත්රික මට්ටමේ නිල ආරාධනයක් ද නැතහොත් පෞද්ගලික ආරාධනයක් ද යන්න තහවුරු කර ගැනීමටයි.
