විනෝදාස්වාදය සඳහා භාවිතා කරන මත්ද්රව්ය මගින් ආඝාත අවදානම දෙගුණයකින් ඉහළ නංවන බව හෙළි වෙයි
විනෝදාස්වාදය සඳහා භාවිතා කරන මත්ද්රව්ය (Recreational drugs) මගින් ආඝාතය (Stroke) වැළඳීමේ අවදානම දෙගුණයකටත් වඩා ඉහළ නැංවිය හැකි බව මිලියන 100ක ජනතාවකගේ වෛද්ය දත්ත ඇසුරින් සිදුකළ අතිවිශාල පර්යේෂණයකින් හෙළි වී තිබේ. කේම්බ්රිජ් විශ්වවිද්යාලයේ පර්යේෂකයන් විසින් සිදු කරන ලද මෙම විශ්ලේෂණයට අනුව මත්ද්රව්ය භාවිතා නොකරන පුද්ගලයන්ට සාපේක්ෂව ඇම්ෆෙටමින් භාවිතා කරන්නන්ගේ ආඝාත අවදානම 122%කින් ද කොකේන් භාවිතා කරන්නන්ගේ අවදානම 96%කින් ද ඉහළ ගොස් ඇත. එමෙන්ම ගංජා භාවිතා කරන්නන් අතර මෙම අවදානම 37%ක් ලෙස වාර්තා වන නමුත් වේදනා නාශකයක් ලෙස භාවිතා කරන ඔපියොයිඩ් මගින් ආඝාත අවදානම ඉහළ යන බවට සාක්ෂි හමු වී නොමැත.
මෙම පර්යේෂණයේ වඩාත්ම කනස්සල්ලට කරුණ වන්නේ වයස අවුරුදු 55ට අඩු පුද්ගලයන් කෙරෙහි මෙයින් එල්ල වන බලපෑමයි. එම වයස් කාණ්ඩයේ ඇම්ෆෙටමින් භාවිතා කරන්නන් අතර ආඝාත අවදානම තෙගුණයකින් පමණ ඉහළ යන බව නිරීක්ෂණය වී තිබේ. මොළයට රුධිරය සපයන නාල අවහිර වීම හෝ පුපුරා යාම නිසා ආඝාතය හටගන්නා අතර එය ලොව පුරා සිදුවන මරණවලට ප්රධානතම හේතුවක් ලෙස සැලකේ. විද්යාඥයින් පවසන පරිදි ඇම්ෆෙටමින් සහ කොකේන් මගින් රුධිර පීඩනය ශීඝ්රයෙන් ඉහළ නංවන අතර මොළයේ රුධිර නාල පටු කිරීමට ද හේතු වෙයි. එමෙන්ම කොකේන් මගින් ධමනි තුළ මේදය තැන්පත් වී ඒවා දැඩි වීම හෙවත් ධමනි සිහින් වීම වේගවත් කරන අතර ගංජා භාවිතය නිසා රුධිර නාල පටු වීම සහ රුධිර කැටිති ඇති වීම ප්රවර්ධනය විය හැකිය.
ලොව පුරා මිලියන 300ක පමණ පිරිසක් නිතිපතා විවිධ මත්ද්රව්ය භාවිතා කරන බව එක්සත් ජාතීන්ගේ සංවිධානය පවසන අතර මෙම නවතම සොයා ගැනීම් මගින් මත්ද්රව්ය භාවිතයේ ඇති බරපතල සෞඛ්ය අවදානම යළිත් තහවුරු කර ඇත. ආඝාතයෙන් 90%ක්ම වළක්වා ගත හැකි ඒවා වන බැවින් මත්ද්රව්යවලින් වැළකී සිටීම සහ සෞඛ්ය සම්පන්න ජීවන රටාවක් පවත්වා ගැනීම අතිශය වැදගත් වේ. විශේෂයෙන්ම තරුණ ප්රජාව මෙම අවදානම පිළිබඳව දැනුවත් වීම කාලීන අවශ්යතාවකි.
