ශ්රී ලංකාවේ නැඟී එන හෙල්ල විසි කිරීමේ ශූරයෙකු වන රුමේෂ් තරංග, මහින්ද රාජපක්ෂ ක්රීඩාංගණයේදී පැවැති ශූරයන්ගේ මලල ක්රීඩා තරඟාවලියේදී (Champions Track & Field Meet) මීටර් 89.37ක දක්ෂතාවක් දක්වමින් නව ජාතික වාර්තාවක් පිහිටුවීමට සමත්ව තිබේ.
22 හැවිරිදි මෙම ක්රීඩකයා සිය අවසන් උත්සාහයේදී මෙම වාර්තාගත දක්ෂතාව ප්රදර්ශනය කළේය. ඔහු සිය පළමු උත්සාහයේදී මීටර් 78.39ක් ද, අනතුරුව පිළිවෙළින් මීටර් 83.35, 83.68, 84.33 සහ 84.62 බැගින් වූ දක්ෂතා ද දක්වමින් ඉතා ස්ථාවර මට්ටමක පසුවිය. පසුව අවසන් උත්සාහයේදී මීටර් 89.37ක දක්ෂතාවක් දක්වමින් ඔහු විසින්ම මීට පෙර පිහිටුවා තිබූ මීටර් 86.50ක පෙර ජාතික වාර්තාව අලුත් කිරීමට සමත් විය.
මෙම විශිෂ්ට දක්ෂතාවත් සමඟ තරංග ලෝක වාරික ශ්රේණිගත කිරීම්වල (World Seasonal Rankings) ඉහළටම පැමිණීමට සමත්ව ඇති අතර, මීට පෙර පෙබරවාරි මාසයේදී ඕස්ට්රේලියාවේදී ඔහු වාර්තා කර තිබූ මීටර් 83.07ක දක්ෂතාවය ද මේ සමඟින් ඔහු අභිබවා ගියේය.
රුමේෂ් තරංග පසුගිය වසරේ පැවති ලෝක ශූරතාවලියේ අවසන් මහා තරඟයට සුදුසුකම් ලැබූ අතර, සුසන්තිකා ජයසිංහගෙන් පසුව වසර 19කට පසු ලෝක ශූරතා අවසන් මහා තරඟයකට සුදුසුකම් ලැබූ පළමු ශ්රී ලාංකික මලල ක්රීඩකයා බවට ද ඔහු පත්විය. ටෝකියෝ ලෝක ශූරතාවලියේදී ඔහු හත්වැනි ස්ථානයට පත්වූයේ ඔලිම්පික් රන් පදක්කම්ලාභීන් වන නීරාජ් චොප්රා (Neeraj Chopra) සහ අර්ෂාඩ් නදීම් (Arshad Nadeem) වැනි ලොව සුපිරි ක්රීඩකයින් ද අභිබවා යමිනි. කොළඹ සාන්ත පීතර විද්යාලයේ ආදි සිසුවෙකු වන ඔහු ටෝනි ප්රසන්න මහතා යටතේ පුහුණුව ලබයි.
