මැදපෙරදිග කලාපයේ ඇමෙරිකාව සහ ඊශ්රායලය එක්ව ඉරානයට එල්ල කරන ප්රහාර හමුවේ රුසියානු ජනාධිපති ව්ලැඩිමීර් පුටින් දැඩි දේශපාලන සහ යුදමය අර්බුදයකට මුහුණ දී සිටින බව ‘දි එකොනොමිස්ට්’ (The Economist) සඟරාව වාර්තා කරයි. වසර ගණනාවක් පුරා ඉරානය සමඟ සමීප සබඳතා පැවැත්වූවද, වත්මන් තත්ත්වය හමුවේ රුසියාව දක්වන නිහඬ ප්රතිපත්තිය ජාත්යන්තර අවධානයට ලක්ව තිබේ.
මෙම තත්ත්වය පිළිබඳ දේශපාලන විශ්ලේෂණය මෙසේය. ඇමෙරිකානු ආරක්ෂක ලේකම් පීට් හෙග්සෙත් (Pete Hegseth) ප්රකාශ කර ඇත්තේ “අපි මෙම යුද්ධය ආරම්භ කළේ නැහැ, නමුත් ජනාධිපති ට්රම්ප් යටතේ අපි එය අවසන් කරනවා” යනුවෙනි. පුදුමයකට මෙන්, මීට වසර කිහිපයකට පෙර රුසියාව යුක්රේනය ආක්රමණය කළ අවස්ථාවේදී පුටින් ද පැවසුවේ තමන් යුද්ධය ආරම්භ නොකළ බවත් එය අවසන් කිරීමට උත්සාහ කරන බවත්ය. සිය වදන්ම ඉංග්රීසි බසින් ඇසීම නිසාදෝ, ඉරානයට එල්ල වන ප්රහාර හමුවේ රුසියාව මෙතෙක් ප්රබල විරෝධයක් දක්වා නොමැත.
විශ්ලේෂකයන් පෙන්වා දෙන්නේ රුසියාවට දැනට ඉරානයට උදව් කිරීමට ඇති හැකියාව සීමිත බවයි. රුසියාවේ අවධානය සහ සම්පත් යුක්රේන යුද්ධය සඳහා යොදවා ඇති බැවින් මැදපෙරදිග සෘජු යුදමය මැදිහත්වීමක් කිරීමට පුටින් අකමැති වී තිබේ. අනෙක් අතට, ඩොනල්ඩ් ට්රම්ප් සමඟ පවතින මිත්රත්වය ආරක්ෂා කර ගැනීම හරහා යුක්රේන අර්බුදයට රුසියාවට හිතකර විසඳුමක් ලබා ගැනීමට පුටින් අපේක්ෂා කරයි. මේ නිසා, තම සගයෙකු වන ඉරානය අනතුරේ වැටී තිබියදී වුවද, ඇමෙරිකාව සමඟ සෘජු ගැටුමකට නොයාමට රුසියාව වගබලා ගනිමින් සිටියි.
