මැදපෙරදිග කලාපයේ උග්ර වෙමින් පවතින අර්බුදය හමුවේ ශ්රී ලංකාවේ ජාතික ආරක්ෂාවට සහ ආර්ථිකයට එල්ල විය හැකි බරපතළ බලපෑම් පිළිබඳව සාකච්ඡා කිරීම සඳහා විපක්ෂ නායක සජිත් ප්රේමදාස මහතා විදේශ ප්රතිපත්ති විශේෂඥයින්, හිටපු රාජ්ය තාන්ත්රිකයින් සහ විද්වතුන් සමඟ හදිසි සාකච්ඡාවක් පවත්වා තිබේ. ‘ඩිට්වා’ (Ditwah) සුළි කුණාටුව හේතුවෙන් ඇමරිකානු ඩොලර් බිලියන 4.1කට අධික ආර්ථික පාඩුවක් ලබා ඇති මෙරට ආර්ථිකය, මෙම නව ලෝක දේශපාලනික තත්ත්වය හමුවේ තවදුරටත් අවදානමකට ලක්ව ඇති බව මෙහිදී අවධාරණය කෙරිණි.
විශේෂයෙන්ම පසුගිය මාර්තු 4 වනදා ගාල්ල වෙරළට නාවික සැතපුම් 19ක් ඔබ්බෙන් වූ මුහුදේදී ඉරාන යුද නෞකාවක් අමෙරිකානු සබ්මැරීනයක් විසින් ගිල්වා දැමීමත් සමඟ මෙම ගැටුම ශ්රී ලංකාවට ඉතා ආසන්නයට පැමිණ ඇති බව විපක්ෂ නායකවරයා පෙන්වා දුන්නේය. මෙම තත්ත්වය කළමනාකරණය කිරීම සඳහා ඔහු ‘PSOP’ (සාමය, ආරක්ෂාව, ස්ථාවරත්වය, අනුපිළිවෙල සහ සමෘද්ධිය) නමින් නව වැඩපිළිවෙලක් හඳුන්වා දුන් අතර රජය වහා අවධානය යොමු කළ යුතු ප්රමුඛතා හතරක් ඉදිරිපත් කළේය.
මුලින්ම, ජාතික බලශක්ති හදිසි තත්ත්වයක් ප්රකාශයට පත් කළ යුතු බවත්, දැනට මෙරට පවතින්නේ මාසයකට පමණක් සෑහෙන පිරිපහදු කළ ඉන්ධන සංචිතයක් බැවින් සූර්ය හා සුළං බලශක්ති ව්යාපෘති කඩිනම් කළ යුතු බවත් ඔහු පැවසීය. දෙවනුව, මැදපෙරදිග වෙසෙන මිලියන 1.5කට අධික ශ්රමිකයින්ගේ ආරක්ෂාව තහවුරු කිරීමටත්, කලාපීය බැංකු පද්ධති බිඳ වැටුණහොත් ඔවුන්ට ආරක්ෂිතව මුදල් එවීම සඳහා විකල්ප තාක්ෂණික ක්රමවේදයක් සකස් කිරීමටත් යෝජනා කෙරිණි.
තෙවනුව, නැව් ගාස්තු සහ රක්ෂණ වාරික අධික ලෙස ඉහළ යාම හේතුවෙන් තේ සහ ඇඟලුම් අපනයනයට වන බාධා වැළැක්වීමට රජයේ මැදිහත්වීමෙන් සමුද්රීය රක්ෂණ අරමුදලක් පිහිටුවන ලෙස ඔහු ඉල්ලා සිටියේය. අවසාන වශයෙන්, ඉන්දීය සාගර කලාපය තුළ වෙළෙඳ නැව් ගමන් මාර්ග යුද මුක්ත කලාප බවට පත් කිරීමට ශ්රී ලංකාව ජාත්යන්තර මට්ටමින් වඩාත් ක්රියාකාරී රාජ්ය තාන්ත්රික කාර්යභාරයක් ඉටු කළ යුතු බව විපක්ෂ නායකවරයා වැඩිදුරටත් අවධාරණය කළේය.
