OpenAI සමාගමේ ප්රධාන විධායක නිලධාරී සෑම් ඇල්ට්මන් (Sam Altman) විසින් මීට දශක දෙකකට පෙර තමන්ව ලිංගික අපයෝජනයට ලක් කළ බවට ඔහුගේ සහෝදරිය විසින් පවරා ඇති සිවිල් නඩුව, මිසූරි ප්රාන්තයේ ළමා ලිංගික අපයෝජන පනත යටතේ ඉදිරියට ගෙන යාම සඳහා ඊයේ (01) සංශෝධනය කර තිබේ. ශාන්ත ලුවී (St. Louis) ෆෙඩරල් උසාවියේදී මෙම සංශෝධිත පැමිණිල්ල ගොනු කර ඇති අතර, විනිසුරු සැකරි බ්ලූස්ටෝන් (Zachary Bluestone) මීට පෙර ප්රකාශ කර තිබුණේ ඇයගේ මුල් චෝදනා කාලය ඉක්මවා ගොස් ඇති නමුත් නව පනත යටතේ නඩුව ගොනු කළ හැකි බවයි.
ඇය චෝදනා කරන්නේ 1997 සහ 2006 අතර කාලය තුළ මිසූරිහි පිහිටි ඔවුන්ගේ නිවසේදී සෑම් ඇල්ට්මන් විසින් තමන්ව ලිංගික අපයෝජනයට ලක් කළ බවයි. ඇය පවසන පරිදි මෙම අපයෝජනය ආරම්භ වන විට ඇයගේ වයස අවුරුදු 3ක් වූ අතර ඇල්ට්මන්ගේ වයස අවුරුදු 12කි. දැනට 40 හැවිරිදි වියේ පසුවන සෑම් ඇල්ට්මන් මෙම සියලු චෝදනා තරයේ ප්රතික්ෂේප කර ඇති අතර, තම සහෝදරියට එරෙහිව අපහාස කිරීමේ නඩුවක් ද ගොනු කර තිබේ.
ඇල්ට්මන් පවුලේ සාමාජිකයන් පවසන්නේ ඇය මානසික සෞඛ්ය ගැටලුවලින් පෙළෙන බවත්, මෙම නඩුව මුදල් ලබා ගැනීමේ අරමුණින් සිදු කරන කප්පම් ගැනීමක් (Extortion) බවත්ය. කෙසේ වෙතත්, ඇය විසින් සමාජ මාධ්ය ඔස්සේ පළ කරන ලද වීඩියෝ පටයක් හරහා “තාක්ෂණික බිලියනපතියෙකු” තමන්ව අපයෝජනය කළ බව ප්රකාශ කිරීමත් සමඟ මෙම සිදුවීම ලෝක අවධානයට ලක් විය. ChatGPT නිර්මාණය කළ OpenAI සමාගමේ සම-නිර්මාතෘවරයා වන සෑම් ඇල්ට්මන් වර්තමානය වන විට ඩොලර් බිලියන 3.3ක පමණ වත්කමකට හිමිකම් කියයි.
