Samsung Electronics සමාගම සිය ස්වයංක්රීය පණිවුඩ හුවමාරු සේවාව වන Samsung Messages ලබන ජූලි මාසයේ සිට නිල වශයෙන් නතර කිරීමට තීරණය කර තිබේ. ඒ වෙනුවට සියලුම Galaxy ස්මාර්ට්ෆෝන් පරිශීලකයන් සඳහා Google Messages යෙදුම (App) භාවිතා කරන ලෙස සමාගම නිල වශයෙන් දැනුම් දී ඇත. මින් ඉදිරියට නිකුත් වන Galaxy S25 ශ්රේණියේ දුරකථන සහ නවතම Galaxy Z Fold6, Flip6 මාදිලිවල පවා පෙරනිමි පණිවුඩ යෙදුම (Default Messaging App) ලෙස ක්රියාත්මක වන්නේ Google Messages පමණි.
මෙම වෙනසත් සමඟ පරිශීලකයන්ට ලැබෙන වාසි සහ විශේෂාංග කිහිපයක් මෙසේය. නවීන RCS (Rich Communication Services) තාක්ෂණය හරහා උසස් තත්ත්වයේ ඡායාරූප සහ වීඩියෝ හුවමාරු කර ගැනීමටත්, වඩාත් දියුණු සමූහ චැට් (Group Chats) පහසුකම් ලබා ගැනීමටත් මෙහිදී අවස්ථාව හිමි වේ. එමෙන්ම Google හි Gemini AI තාක්ෂණය පදනම් කරගත් විශේෂාංග හරහා පණිවුඩ හුවමාරුව වඩාත් බුද්ධිමත් සහ පහසු එකක් වනු ඇත. ස්මාර්ට්ෆෝන්, ටැබ්ලට් සහ ස්මාර්ට් ඔරලෝසු අතර පණිවුඩ සමමුහුර්ත කිරීම (Syncing) ද මෙමඟින් වඩාත් වේගවත් වේ.
සේවාව අවසන් කරන නිශ්චිත දිනය ඉදිරියේදී යෙදුම හරහා දැනුම් දෙන බව Samsung පවසන අතර, දැනටමත් Samsung Messages භාවිතා කරන පිරිස් හැකි ඉක්මනින් Google Messages වෙත මාරු වන ලෙස ඔවුන් නිර්දේශ කරයි. Galaxy Store හරහා තවමත් පැරණි යෙදුම බාගත කළ හැකි වුවද, ඉදිරියේදී ඇන්ඩ්රොයිඩ් පණිවුඩ පද්ධතිය මුළුමනින්ම Google Messages වටා කේන්ද්රගත වනු ඇති බව ක්ෂේත්රයේ විචාරකයෝ පවසති. කෙසේ වෙතත්, Samsung Messages හි පැවති සමහර පුද්ගලීකරණය කළ සැකසුම් (Customization) Google Messages හිදී යම් සීමාවන්ට ලක් විය හැකි බව ද සඳහන් වේ.
