සෞදි අරාබි රාජධානිය සහ ශ්රී ලංකාව අතර නාවික ධාරිතාවන් ඉහළ නැංවීම සහ ආරක්ෂක සබඳතා වර්ධනය කර ගැනීම පිළිබඳ විශේෂ ද්විපාර්ශ්වික සාකච්ඡාවක් රියාද් නුවරදී පවත්වා තිබේ. සෞදි අරාබියේ පැවැති “ලෝක ආරක්ෂක ප්රදර්ශනය – 2026″ (World Defence Show) සඳහා සහභාගී වූ ශ්රී ලංකා ආරක්ෂක නියෝජ්ය අමාත්ය විශ්රාමික මේජර් ජෙනරල් අරුණ ජයසේකර මහතා සහ සෞදි අරාබි නියෝජ්ය ආරක්ෂක මාණ්ඩලික ප්රධානී වයිස් අද්මිරාල් ෆහාඩ් අල් ගොෆයිලි (Fahad Al Ghofaily) අතර මෙම නිල හමුව සිදු විය. දෙරටේ සන්නද්ධ හමුදාවන් අතර මෙහෙයුම් දැනුම සහ ප්රායෝගික අත්දැකීම් හුවමාරු කර ගැනීම මෙහි ප්රධාන අරමුණක් වී ඇත.
මෙම සාකච්ඡාවලදී විශේෂයෙන්ම ශ්රී ලංකා සන්නද්ධ හමුදා නිලධාරීන් සඳහා සෞදි අරාබියේ අනුග්රහයෙන් ලබා දෙන පුහුණු අවස්ථා තවදුරටත් පුළුල් කිරීම කෙරෙහි අවධානය යොමු විය. ශ්රී ලංකා නාවික හමුදාවේ නිරීක්ෂණ හැකියාවන් සහ ගැඹුරු මුහුදේ මෙහෙයුම් ධාරිතාව ඉහළ නැංවීම සඳහා අවශ්ය තාක්ෂණික හා උපකරණ සහාය ලබා ගැනීම පිළිබඳව ද මෙහිදී දීර්ඝ වශයෙන් කරුණු සාකච්ඡා කර තිබේ. ඉන්දියන් සාගර කලාපය තුළ සිදුවන නීති විරෝධී සමුද්රීය කටයුතු මර්දනය කිරීම සහ නැගී එන නව ආරක්ෂක අභියෝගයන්ට සාර්ථකව මුහුණ දීම සඳහා මෙම ධාරිතා වර්ධන මුලපිරීම් අතිශය වැදගත් වන බව ආරක්ෂක අමාත්යාංශය පෙන්වා දෙයි.
වසර ගණනාවක සිට සෞදි අරාබිය සහ ශ්රී ලංකාව අතර පවතින රාජ්යතාන්ත්රික සබඳතා ආරක්ෂක ක්ෂේත්රය දක්වා ව්යාප්ත කිරීම දෙරටේම ආරක්ෂාවට සහ ස්ථාවරත්වයට ඉවහල් වන බව දෙපාර්ශවයම මෙහිදී අවධාරණය කළහ. ආයතනික සහයෝගීතාව තවදුරටත් තහවුරු කිරීමට එකඟ වූ මෙම සාකච්ඡාව ඉතා සාර්ථක වූ බවත්, ඉදිරියේදී නාවික මෙහෙයුම් සම්බන්ධ ඒකාබද්ධ වැඩසටහන් ක්රියාත්මක වනු ඇති බවත් ආරක්ෂක අමාත්යාංශය නිකුත් කළ නිවේදනයේ වැඩිදුරටත් සඳහන් වේ.
