අමෙරිකාව සහ ඉරානය අතර පවතින දරුණු යුදමය ගැටුම හමුවේ සෞදි අරාබිය සිය ස්ථාවරය ඉරානයට ඉතා පැහැදිලිව දැනුම් දී තිබේ. සෞදි විදේශ අමාත්ය ෆයිසාල් බින් ෆර්හාන් කුමරු සිය ඉරාන සගයා වන අබ්බාස් අරග්චි අමතමින් අවධාරණය කර ඇත්තේ, සෞදි අරාබියේ භූමියට හෝ එරට තීරණාත්මක බලශක්ති යටිතල පහසුකම්වලට ඉරානය විසින් එල්ල කරන ප්රහාර වහාම නැවැත්විය යුතු බවයි.
මෙම රාජ්යතාන්ත්රික පණිවිඩය පිළිබඳව රොයිටර් පුවත් සේවය වාර්තා කළ වැදගත් තොරතුරු කිහිපයක් මෙසේය. සෞදි බලශක්ති මධ්යස්ථානවලට දිගින් දිගටම හානි සිදුවුවහොත්, ඊට සමාන අයුරින් ඉරානයට ප්රතිප්රහාර දීමට සෞදිය පසුබට නොවන බවට අනතුරු අඟවා ඇත. මෙතෙක් අමෙරිකානු හමුදාවන්ට ඉරානයට එරෙහි ප්රහාර සඳහා සෞදි ගුවන් සීමාව හෝ කඳවුරු භාවිත කිරීමට අවසර ලබා දී නොතිබුණද, ඉරාන ප්රහාර නතර නොවන්නේ නම් එම පහසුකම් අමෙරිකාවට ලබා දීමට සෞදි රජයට සිදුවනු ඇති බව ද ඔවුන් පවසා තිබේ. ඉරාන ජනාධිපති මසූඩ් පෙසෙෂ්කියන් පසුගියදා සිය දේශනයකදී පවසා තිබුණේ, ඉරාන ප්රහාරවලින් අසල්වැසි ගල්ෆ් රටවල සිවිල් ඉලක්කවලට සිදුවූ හානි සම්බන්ධයෙන් තමන් කණගාටු වන බවයි.
පසුගිය මාර්තු 02 වනදා ඉරාන ඩ්රෝන ප්රහාරයක් හේතුවෙන් සෞදි අරාම්කෝ සමාගමේ රස් තනුරා තෙල් පිරිපහදුව තාවකාලිකව වසා දැමීමට ද සිදුවිය. මෙම පසුබිම තුළ සෞදි අරාබිය සහ ඉරානය අතර පවතින රාජ්යතාන්ත්රික සබඳතා අතිශය තීරණාත්මක මට්ටමක පවතී.
