රාමසාන් උත්සව සමය වෙනුවෙන් අබුඩාබිහි ෂෙයික් සයීඩ් මහා පල්ලිය (Sheikh Zayed Grand Mosque) සංවිධානය කරන “අපගේ උපවාස අමුත්තෝ” (Our Fasting Guests) වැඩසටහන යටතේ දිනපතා දහස් සංඛ්යාත පිරිසක් එක්ව සිය උපවාසය අත්හැරීමේ ඉෆ්තාර් අවස්ථාවට එක් වෙති. එක්සත් අරාබි එමීර් රාජ්යයේ ආගන්තුක සත්කාරය සහ මානුෂීය වටිනාකම් විදහා දක්වන මෙම දැවැන්ත වැඩසටහන හරහා මෙවර රාමසාන් මාසයේ පළමු සතිය තුළ පමණක් පුද්ගලයින් 371,000කට අධික පිරිසකට ආහාර පාන සපයා තිබේ.
එක්සත් අරාබි එමීර් රාජ්යයේ නිර්මාතෘ ෂෙයික් සයීඩ් බින් සුල්තාන් අල් නහියන් (Sheikh Zayed bin Sultan Al Nahyan) මහතාගේ මගපෙන්වීම් සහ පරිත්යාගශීලී උරුමය ගරු කරමින් මෙම සත්කාරය වාර්ෂිකව සිදු කරනු ලබයි. පල්ලියේ මළුව පුරා දිගු මේස මත රටඉඳි, ජලය සහ සාම්ප්රදායික ආහාර පාන පිළියෙල කර ඇති අතර, ස්වේච්ඡා සේවකයන් විශාල පිරිසක් පැමිණෙන බැතිමතුන් සහ සංචාරකයන් වෙත සේවා සැපයීමට එක්ව සිටිති.
ඉෆ්තාර් සැමරුමට අමතරව, සෑම රාත්රියකම පැවැත්වෙන විශේෂ ‘තරාවිහ්’ (Taraweeh) යාඥාවන් සඳහා ද දහස් සංඛ්යාත ඉස්ලාම් බැතිමතුන් පිරිසක් මෙම මහා පල්ලිය වෙත රොක් වෙති. මෙය එමීර් රාජ්යය තුළ පවතින සහජීවනය සහ ආගමික භක්තිය මැනවින් නිරූපණය කරන අවස්ථාවක් ලෙස සැලකේ.
