මැදපෙරදිග කලාපයේ පවතින යුදමය වාතාවරණය හේතුවෙන් ලෝක වෙළඳපොළේ තෙල් මිල ඉහළ යාම සහ ඒ හරහා ඇතිවිය හැකි උද්ධමනකාරී තත්ත්වය පාලනය කිරීම සඳහා සිංගප්පූරු මහ බැංකුව (Monetary Authority of Singapore) හෙට (අප්රේල් 14) සිය මූල්ය ප්රතිපත්ති දැඩි කිරීමට සූදානම් වන බව වාර්තා වේ. මේ අනුව, මෑතකාලීන මැදපෙරදිග ගැටුම්වලින් අනතුරුව සිය ආර්ථික ප්රතිපත්ති සංශෝධනය කරන ආසියාවේ පළමු රටවල් කිහිපය අතරට සිංගප්පූරුව ද එක්වනු ඇත.
බ්ලූම්බර්ග් (Bloomberg) ආයතනය විසින් ආර්ථික විද්යාඥයින් 18 දෙනෙකු අතර සිදු කරන ලද සමීක්ෂණයකදී ඉන් 15 දෙනෙකුම අනුමාන කර ඇත්තේ හෙට පැවැත්වෙන සමාලෝචනයේදී සිංගප්පූරු මහ බැංකුව සිය ප්රතිපත්ති දැඩි කරනු ඇති බවයි. මැදපෙරදිග ගැටුම් තවදුරටත් උත්සන්න වීම සහ ලෝක ආර්ථිකය පසුබෑමකට ලක්වීමේ අවදානම මෙහිදී ප්රධාන සාධක ලෙස හඳුනාගෙන තිබේ.
මීට අමතරව, සිංගප්පූරු වෙළඳ අමාත්යාංශය විසින් මෙවසරේ පළමු කාර්තුවට අදාළ ආර්ථික වර්ධන වේගය ද හෙට ප්රකාශයට පත් කිරීමට නියමිතය. ආර්ථික විද්යාඥයින් පෙන්වා දෙන්නේ පසුගිය කාර්තුවට සාපේක්ෂව සිංගප්පූරුවේ දළ දේශීය නිෂ්පාදිතය (GDP) සියයට 0.9 කින් පමණ පහත වැටෙනු ඇති බවයි. කෙසේ වෙතත්, වාර්ෂික පදනම මත ආර්ථිකය සියයට 6 ක වර්ධනයක් පෙන්වනු ඇතැයි ද අනුමාන කෙරේ.
