ලෝකප්රකට එයාර්බස් (Airbus) ගුවන් යානා ගනුදෙනුවට අදාළව ඇමරිකානු ඩොලර් මිලියන ගණනක අල්ලස් ලබාගැනීමේ චෝදනාව මත අත්අඩංගුවට ගෙන සිටින ශ්රී ලංකන් ගුවන් සේවයේ හිටපු ප්රධාන විධායක නිලධාරී කපිල චන්ද්රසේන මහතා ලබන අප්රේල් මස 02 වනදා දක්වා තවදුරටත් රිමාන්ඩ් බන්ධනාගාරගත කිරීමට කොළඹ මහේස්ත්රාත් අධිකරණය අද (19) නියෝග කළේය. කොළඹ ප්රධාන මහේස්ත්රාත් අසංග එස්. බෝදරගම මහතා මෙම නියෝගය නිකුත් කරනු ලැබුවේ අල්ලස් හෝ දූෂණ චෝදනා විමර්ශන කොමිෂන් සභාව විසින් ඉදිරිපත් කළ කරුණු සලකා බැලීමෙන් අනතුරුවයි.
කපිල චන්ද්රසේන මහතා 2026 මාර්තු 12 වන දින අත්අඩංගුවට ගනු ලැබුවේ 2013 වසරේදී ශ්රී ලංකන් ගුවන් සේවය වෙනුවෙන් ඇමරිකානු ඩොලර් බිලියන 2.3ක වටිනාකමකින් යුත් ගුවන් යානා 10ක් මිලදී ගැනීමේ ගනුදෙනුවකට අදාළව ඇමරිකානු ඩොලර් මිලියන 2ක අල්ලසක් ලබාගත් බවට එල්ල වූ චෝදනා මතය. මීට අමතරව, සමස්තයක් ලෙස ඇමරිකානු ඩොලර් මිලියන 16ක අල්ලසක් ලබා ගැනීමට කුමන්ත්රණය කිරීම සහ ඉන් යුරෝ මිලියන 1.45ක මුදලක් සිංගප්පූරුවේ බැංකු ගිණුමකට ලබා ගැනීම සම්බන්ධයෙන් ද ඔහුට චෝදනා එල්ල වී තිබේ.
අභිචෝදකයන් පෙන්වා දෙන්නේ චන්ද්රසේන මහතා විසින් සිය බිරිඳගේ නමින් බෘෘනායි රාජ්යයේ ව්යාජ සමාගමක් (Shell company) පිහිටුවා ඇති බවත්, අදාළ අල්ලස් මුදල් එම සමාගමට අයත් සිංගප්පූරු බැංකු ගිණුමකට බැර කරවා ගැනීමට කටයුතු කර ඇති බවත්ය. අද දින ඉදිරිපත් වූ කරුණු සලකා බැලූ අධිකරණය සැකකරු ලබන අප්රේල් 02 දක්වා රක්ෂිත බන්ධනාගාරගත කිරීමට නියම කළේය.
