මධ්යම කඳුකරයේ බටහිර බැවුම් ප්රදේශවල පවතින දැඩි වියළි කාලගුණික තත්ත්වය හේතුවෙන් කාසල්රි සහ මවුස්සාකැලේ ප්රධාන ජලාශවල ජල මට්ටම ශීඝ්රයෙන් පහළ බැස ඇති බව වාර්තා වේ. ජලාශ භාර ඉංජිනේරුවන් පවසන පරිදි, ඊයේ (26) පස්වරුව වන විට මවුස්සාකැලේ ජලාශය පිටාර මට්ටමේ සිට අඩි 40 අඟල් 9 කින් සහ කාසල්රි ජලාශය අඩි 39 අඟල් 4 කින් පහළ බැස තිබේ. ජල මට්ටම මෙලෙස අඩු වීමත් සමඟ ජලාශ පතුලේ යටවී තිබූ පැරණි නටඹුන් සහ ගොඩනැගිලි කොටස් යළි මතු වෙමින් පවතින අයුරු දැකගත හැකිය.
මෙම ජලාශ දෙක මෙරට ජල විදුලි උත්පාදන පද්ධතියට අතිශය තීරණාත්මක වන අතර, ඒවායේ ජලය විමලසුරේන්ද්ර, කැනියොන්, ලක්ෂපාන, නව ලක්ෂපාන සහ පොල්පිටිය යන ප්රධාන ජල විදුලි බලාගාර සඳහා යොදා ගැනේ. පවතින වියළි කාලගුණය තවදුරටත් පැවතුනහොත් ජල විදුලි උත්පාදනයට සෘජු බාධා එල්ල විය හැකි බවට බලධාරීන් අනතුරු අඟවන අතර, එමගින් ජාතික විදුලි පද්ධතියේ සමබරතාවයට ද බලපෑම් එල්ල වීමේ අවදානමක් පවතී.
වර්ෂාව නොලැබීම හේතුවෙන් ජල මට්ටම දිනෙන් දින පහළ යමින් පවතින බැවින්, පවතින ජල සංචිත ඉතා අරපිරිමැස්මෙන් කළමනාකරණය කිරීමට විදුලිබල මණ්ඩලය පියවර ගනිමින් සිටී. මෙම තත්ත්වය හමුවේ විදුලිය සහ ජලය පිරිමැසුම්දායක ලෙස භාවිත කරන ලෙස ජනතාවගෙන් ඉල්ලා සිටින අතර, ඉදිරි සති කිහිපය තුළ කාලගුණික වෙනසක් සිදු නොවුවහොත් විදුලි උත්පාදනය සඳහා වෙනත් විකල්ප ක්රමවේද වෙත වැඩි වශයෙන් යොමු වීමට සිදුවනු ඇත.
