ශ්රී ලංකා නාවික හමුදාවේ අතිවිශේෂ ප්රහාරක ඒකකය වන විශේෂ යාත්රා බලඝණයේ (SBS) 33 වන බඳවා ගැනීමට අයත් නාවිකයන් 24 දෙනෙකු සිය දුෂ්කර පුහුණුව නිමා කර ඊයේ විසිර ගියහ. ත්රිකුණාමලය නාවික තඨාකාංගනයේ පිහිටි විශේෂ යාත්රා බලඝණ මූලස්ථානයේදී පැවැති මෙම අභිමානවත් උත්සවයේ ප්රධාන ආරාධිතයා ලෙස නාවික හමුදාපති වයිස් අද්මිරාල් කාන්චන බානගොඩ මහතා සහභාගී විය. එහිදී පුහුණුව සාර්ථකව නිමා කළ සාමාජිකයන් වෙත විශේෂ යාත්රා බලඝණ ලාංඡනය පැළඳවීම නාවික හමුදාපතිවරයා අතින් සිදු වූ අතර දක්ෂතා දැක්වූ නාවිකයන් වෙත විශේෂ කුසලාන ද පිරිනැමිණි.
මෙහිදී සාමාන්ය නැවි ඩබ්එස්ඒ ප්රනාන්දු අතිශූර පුහුණු සාමාජිකයා, දක්ෂතම ක්රීඩකයා සහ සියලුම විෂයන්ගෙන් වැඩිම ලකුණු ලබාගත් සාමාජිකයා ලෙස සම්මාන දිනාගත් අතර සාමාන්ය නැවි ජේඑම්ආර්පී ජයතිලක දක්ෂතම වෙඩික්කරු ලෙස සම්මානයට පාත්ර විය. මීට අමතරව හොඳම ශාරීරික යෝග්යතාකරු ලෙස සාමාන්ය නැවි පීඑස් ජයවර්ධනත්, අතිශූර පිහිනුම්කරු ලෙස සාමාන්ය නැවි එස්ඊටී සුමතිරත්නත් කුසලාන දිනා ගත්හ. අදහස් දැක්වූ නාවික හමුදාපතිවරයා අවධාරණය කළේ මෙම ලාංඡනය හුදෙක් ජයග්රහණයක් පමණක් නොව එය බැරෑරුම් වගකීමක සංකේතයක් වන බැවින් රට මත්ද්රව්යවලින් මුදවා ගැනීමේ “රටම එකට” ජාතික මෙහෙයුම සඳහා උපරිම දායකත්වය ලබා දෙන ලෙසයි.
විසිර යාමේ උත්සවයට සමගාමීව විශේෂ යාත්රා බලඝණ සාමාජිකයන්, පැරෂුට් සංචිතය සහ සංග්රාමික සුනඛ කණ්ඩායම් එක්ව නිකල්සන් කෝව් මුහුදු තීරයේදී විශේෂ සංදර්ශනයක් ද ඉදිරිපත් කරන ලදී. ගොඩබිම, ගුවන සහ දියඹ යා කරමින් සිදු කළ මෙම දක්ෂතා දැක්වීම් නැරඹීම සඳහා නාවික හමුදා ජ්යෙෂ්ඨ නිලධාරීන් මෙන්ම විසිර ගිය නාවිකයන්ගේ දෙමාපියන් ද විශාල පිරිසක් එක්ව සිටියහ.
