ශ්රී ලංකාව කිසිදු පාර්ශ්වයකට පක්ෂග්රාහී නොවන සෘජු සහ ස්ථාවර විදේශ ප්රතිපත්තියක් අනුගමනය කරන බව විදේශ කටයුතු අමාත්ය විජිත හේරත් මහතා අද (19) පාර්ලිමේන්තුවේදී අවධාරණය කළේය. මෑතකදී පැවැති ජාත්යන්තර සමුළුවකදී තමන් දැක්වූ අදහස් විකෘති කරමින් සමාජ මාධ්ය ඔස්සේ පැතිර යන විවේචනවලට පිළිතුරු දෙමින් අමාත්යවරයා සඳහන් කළේ, වත්මන් ගෝලීය දේශපාලන සන්දර්භය තුළ රාජ්යතාන්ත්රිකව කටයුතු කිරීම “දැලිපිහියෙන් කිරි කන්නාක් වැනි” අතිශය අවදානම් සහගත සහ සූක්ෂම ක්රියාවලියක් බවයි.
ලෝක බලවතුන් අතර පවතින ගැටුම් හමුවේ රජය සැමවිටම පෙනී සිටින්නේ ලෝක සාමය වෙනුවෙන් පමණක් බව පැවසූ අමාත්යවරයා, එක්සත් ජාතීන්ගේ ආරක්ෂක මණ්ඩලයට ඉදිරිපත් වූ අසමබර යෝජනාවකට ශ්රී ලංකාව විරුද්ධ වූයේ එය දෙපාර්ශ්වයටම සාධාරණ නොවන බැවින් බව පෙන්වා දුන්නේය. “යුද්ධයකදී දෙපාර්ශ්වයම වගකියන්න ඕනේ. එක පැත්තකට විතරක් චෝදනා කරන යෝජනාවලට අපි එකඟ වෙන්නේ නැහැ,” යනුවෙන් ඔහු සඳහන් කළේය. එසේම වැලිසර නාවික හමුදා කඳවුරේ රඳවා සිටින ඉරාන නාවිකයන් සම්බන්ධයෙන් කටයුතු කරන්නේ ද ජාත්යන්තර නීතියට අනුකූලව මිස පක්ෂග්රාහීව නොවන බව ඔහු අවධාරණය කළේය.
ඇමරිකා එක්සත් ජනපදය සමඟ පවතින සබඳතා පිළිබඳව ද අමාත්යවරයා මෙහිදී කරුණු අනාවරණය කළේය. දකුණු හා මධ්යම ආසියානු කටයුතු පිළිබඳ ඇමරිකානු නියෝජිතයා සමඟ පැවැති සාකච්ඡාවල ප්රතිඵලයක් ලෙස, ඇමරිකාව විසින් පනවා තිබූ භාණ්ඩ 144ක තහනම භාණ්ඩ 120 දක්වා අඩු කර ගැනීමට රජය සමත් වූ බව ඔහු හෙළි කළේය. ඉරානය සමඟ සමීප සබඳතා පවත්වන අතරම ඇමරිකාව සමඟ ද ගනුදෙනු කරමින් රටට උපරිම වාසි ලබා ගැනීම රජයේ ප්රතිපත්තිය බව අමාත්ය විජිත හේරත් මහතා වැඩිදුරටත් කියා සිටියේය.
