මැදපෙරදිග කලාපයේ පවතින යුදමය වාතාවරණය හමුවේ එහි සේවය කරන ශ්රී ලාංකික ශ්රමිකයින්ගේ ආරක්ෂාව සහ රැකියා සුරක්ෂිතතාව වෙනුවෙන් සියලු ක්රියාමාර්ග ගෙන ඇති බව ශ්රී ලංකා විදේශ සේවා නියුක්ති කාර්යාංශයේ සභාපති කෝශල වික්රමසිංහ මහතා පවසයි. විදේශ කටයුතු අමාත්යාංශයේ උපදෙස් පරිදි තානාපති කාර්යාලවල කම්කරු සුභසාධන අංශ පැය 24 පුරා සීරුවෙන් තබා ඇති අතර, මේ දක්වා කිසිදු ශ්රී ලාංකිකයෙකුට දරුණු තුවාල හෝ ජීවිත අනතුරක් සිදුව ඇති බවට වාර්තා වී නොමැත. යම් හෙයකින් සේවා ස්ථානයෙන් විතැන් වූ හෝ ගැටලුවලට මුහුණ දී සිටින ශ්රමිකයින් සිටී නම්, වහාම 1989 ක්ෂණික ඇමතුම් අංකය හෝ 071 9802822 වට්ස්ඇප් (WhatsApp) අංකය ඔස්සේ කාර්යාංශය දැනුවත් කරන ලෙස දැනුම් දෙනු ලැබේ. තත්ත්වය තවදුරටත් නරක අතට හැරුණහොත් ශ්රමිකයින් මෙරටට ගෙන්වා ගැනීමේ දැවැන්ත වැඩපිළිවෙළක් ක්රියාත්මක කිරීමට රජය සූදානමින් සිටින බවත්, විදේශගත ශ්රමිකයින්ගේ මෙරට සිටින ඥාතීන් මේ පිළිබඳව අනවශ්ය බියක් ඇති කර නොගත යුතු බවත් සභාපතිවරයා වැඩිදුරටත් අවධාරණය කළේය.
