ඇමරිකානු රජය විසින් ශ්රී ලංකා නාවික හමුදාව වෙත පරිත්යාග කරන ලද සිව්වන වෙරළාරක්ෂක නෞකාව වන P628 (හිටපු ‘Decisive’ නෞකාව), අද (23) බැල්ටිමෝර් වරායෙන් සිය ඓතිහාසික චාරිකාව ආරම්භ කළේය. නාවික සැතපුම් 14,775ක දුරක් ගෙවමින් සිදුකරන මෙම ගමන, ශ්රී ලංකා නාවික ඉතිහාසයේ නෞකාවක් සිදුකරන දිගුතම තනි මුහුදු ගමන ලෙස වාර්තා වේ. එමෙන්ම, පානම ඇල හරහා ගමන් කරන ප්රථම ශ්රී ලාංකීය නාවික නෞකාව බවට ද මෙය පත්වනු ඇත.
කැප්ටන් ගයාන් වික්රමසූරිය මහතාගේ නායකත්වයෙන් යුත් නිලධාරීන් 14ක් සහ නාවිකයන් 72කගෙන් සමන්විත දූත පිරිසක් රැගත් මෙම නෞකාව, දින 77ක සංචාරයකින් පසු 2026 මැයි 08 වන දින ත්රිකුණාමල වරායට ළඟා වීමට නියමිතය. මෙම නෞකාව මෙරට සුවිශේෂී ආර්ථික කලාපයේ නිරීක්ෂණ කටයුතු ශක්තිමත් කිරීමටත්, කලාපීය සාගර ආරක්ෂාව තහවුරු කිරීමටත් මහඟු දායකත්වයක් ලබා දෙනු ඇතැයි අපේක්ෂා කෙරේ.
