අනුර කුමාර දිසානායක ජනාධිපතිවරයාගේ නායකත්වයෙන් යුත් ජාතික ජන බලවේග (NPP) රජය, රට තුළ සිදුවන පාතාල වෙඩි තැබීම් සහ මිනීමැරුම් සාමාන්ය සිදුවීම් ලෙස සැලකීමට උත්සාහ කරන්නේදැයි ශ්රී ලංකා පොදුජන පෙරමුණ (SLPP) ප්රශ්න කරයි. අද (18) පැවති මාධ්ය හමුවකදී හිටපු පාර්ලිමේන්තු මන්ත්රී සංජීව එදිරිමාන්න මහතා අවධාරණය කළේ, රටේ සිදුවන ඕනෑම අපරාධයක් ආණ්ඩුක්රම ව්යවස්ථාවට අනුව රජයට එරෙහි අපරාධයක් ලෙස සැලකිය යුතු බවයි.
අකුරේගොඩ ප්රදේශයේ සිදුවූ ද්විත්ව ඝාතනය සම්බන්ධයෙන් මහජන ආරක්ෂක අමාත්ය ආනන්ද විජේපාල මහතා පාර්ලිමේන්තුවේදී සිදුකළ ප්රකාශයක් මෙහිදී දැඩි විවේචනයට ලක් විය. අදාළ ප්රදේශය අධි ආරක්ෂිත කලාපයක් නොවන බවත්, මෙය ජාතික ආරක්ෂාවට හෝ නීතියේ ආධිපත්යයට තර්ජනයක් නොවන හුදකලා සිදුවීමක් බවත් අමාත්යවරයා පවසා තිබුණි. මෙම ප්රකාශය වගකීම් විරහිත එකක් බවත්, එය තවදුරටත් මිනීමැරුම් සිදු කිරීමට පාතාල කල්ලිවලට කරනු ලබන වක්ර ආරාධනයක් වැනි බවත් සංජීව එදිරිමාන්න මහතා පෙන්වා දුන්නේය.
රජය මෙවැනි වෙඩි තැබීම් ස්වභාවධර්මයේ කොටසක් ලෙස හෝ එදිනෙදා සිදුවන සාමාන්ය දේවල් ලෙස හැඳින්වීමට උත්සාහ කිරීම භයානක තත්ත්වයක් බව පොදුජන පෙරමුණ පවසයි. මහ දවල් ප්රසිද්ධ වීදිවල සිදුවන වෙඩි තැබීම් වැළැක්වීමේ වගකීම රජය සතු බවත්, එය “හුදකලා සිදුවීමක්” ලෙස බැහැර කළ නොහැකි බවත් එම පක්ෂය වැඩිදුරටත් අවධාරණය කළේය.
මෙම සිදුවීම් හරහා රටේ පොදු ජනතාවගේ ආරක්ෂාව පිළිබඳව බරපතළ සැකයක් මතු වී ඇති අතර, අපරාධ මර්දනය සඳහා රජය මීට වඩා දැඩි සහ වගකිවයුතු මැදිහත් වීමක් කළ යුතු බව විපක්ෂයේ මතය වී තිබේ.
