සමාජ මාධ්ය භාවිතය නිසා ඇතිවන මානසික ඇබ්බැහිය සහ ඉන් සිදුවන හානිය වෙනුවෙන් මෙටා (ඉන්ස්ටග්රෑම් හිමිකරු) සහ ගූගල් (යූටියුබ් හිමිකරු) යන සමාගම් වගකිව යුතු බවට කැලිෆෝනියා අධිකරණයක් ඊයේ (2026 මාර්තු 25) තීන්දු කළේය. ඒ අනුව, වයස අවුරුදු හයේ සිට මෙම යෙදුම් භාවිතයට ඇබ්බැහි වීම නිසා මානසික පීඩාවට පත් වූ 20 හැවිරිදි තරුණියකට (කේලි – Kaley) ඇමරිකානු ඩොලර් මිලියන 3ක වන්දියක් ගෙවන ලෙස එම සමාගම්වලට නියෝග කර තිබේ.
මෙම තරුණිය අධිකරණය හමුවේ ප්රකාශ කර තිබුණේ ඉන්ස්ටග්රෑම් සහ යූටියුබ් වැනි යෙදුම්වලට ඇබ්බැහි වීම නිසා දිනකට පැය ගණනාවක් ඒවායේ රැඳී සිටීමට සිදු වූ බවයි. එමගින් තමන්ගේ ශරීර ස්වභාවය පිළිබඳව අහිතකර හැඟීම් (Body dysmorphia) ඇති වූ බවත්, ස්වයං හානි කර ගැනීමට පවා සිතිවිලි ඇති වූ බවත් ඇය පෙන්වා දුන්නාය. ඇමරිකාව තුළ පමණක් ඉන්ස්ටග්රෑම් භාවිතා කරන මිලියන 17ක දරුවන්ගෙන් බහුතරයක් දිනකට සාමාන්යයෙන් මිනිත්තු 30ක් පමණ මෙම යෙදුම තුළ ගත කරන බව වාර්තා වේ.
මෙම නඩු තීන්දුව සමාජ මාධ්ය දැවැන්තයින්ට එරෙහිව එල්ල වී ඇති සුවිශේෂී “ගිණුම් පියවීමේ” අවස්ථාවක් ලෙස විචාරකයෝ හඳුන්වති. දැනටමත් මෙටා සහ ගූගල් සමාගම්වලට එරෙහිව මෙවැනිම ආකාරයේ නඩු දහස් ගණනක් ගොනු කර ඇති අතර, මෙම තීන්දුව එම සියලු නඩුවලට ප්රබල පූර්වාදර්ශයක් වනු ඇතැයි අපේක්ෂා කෙරේ. දරුවන් සහ යොවුන් වියේ පසුවන්නන් සමාජ මාධ්යවලට ඇබ්බැහි කරවීම සඳහා මෙම සමාගම් විසින් හිතාමතාම ඇල්ගොරිතම (Algorithms) සකස් කර ඇති බවට එල්ල වන චෝදනා මෙහිදී දැඩි ලෙස අවධානයට ලක් විය.
