දකුණු අප්රිකාවේ පීටර්මාරිට්ස්බර්ග් (Pietermaritzburg) හි පදිංචි 34 හැවිරිදි ඇලෙයිකා ෂෙයික් (Aleyka Shaik) නමැති හෙදිය ඝාතනය කිරීමේ චෝදනාව මත අත්අඩංගුවට ගත් ඇයගේ හිටපු සැමියා වන කීත් චෙට්ටි (Keith Chetty) අද (01) අධිකරණය හමුවට පමුණුවනු ලැබීය. නිවුන් දරුවන් ලැබීමට සිටි පස් මස් ගැබිණියක වූ ඇයව පසුගිය ඉරිදා සන්ධ්යාවේදී පිහියකින් ඇන ඝාතනය කර ඇති බවට ඔහුට චෝදනා එල්ල වී තිබේ.
අධිකරණය හමුවේ පෙනී සිටි 39 හැවිරිදි සැකකරුට දැනට එල්ල වී ඇත්තේ එක් මිනීමැරුම් චෝදනාවක් පමණි. එහෙත් වින්දිත කාන්තාව නිවුන් දරුවන් ලැබීමට සිටි බැවින්, ඔහුට එරෙහිව “ත්රිත්ව මිනීමැරුම්” (Triple Murder) චෝදනා එල්ල කළ යුතු බවට ස්ත්රී පුරුෂ සමාජභාවය පදනම් කරගත් ප්රචණ්ඩත්වයට (GBV) එරෙහි ක්රියාකාරීන් සහ ප්රාදේශීය දේශපාලනඥයන් දැඩිව බලකර සිටියි. ඝාතනය සිදුවන අවස්ථාවේදී ඇය සිය දියණියව රථයට නංවමින් සිට ඇති බව වාර්තා වේ.
සැකකරුට ඇප ලබා නොදෙන ලෙස බල කරමින් අධිකරණය ඉදිරිපිට විරෝධතා ද පැවැත්වුණු අතර, ඔහුගේ ස්ථිර පදිංචිය සහ පසුබිම් තොරතුරු වාර්තා කරන තෙක් ලබන අඟහරුවාදා දක්වා ඔහු රක්ෂිත බන්ධනාගාරගත කරන ලෙස විනිසුරුවරයා නියෝග කළේය. මියගිය ඇලෙයිකා ෂෙයික්ගේ දේහය පිළිබඳ අවසන් කටයුතු පසුගිය සඳුදා සිදු කෙරුණු අතර, ප්රදේශවාසීන් සහ ඇයගේ වත්මන් සැමියා ඇතුළු පවුලේ පිරිස යුක්තිය ඉල්ලා සිටිති.
