ඉරාන යුද්ධය සහ හෝර්මුස් සමුද්ර සන්ධිය අවහිර වීම හේතුවෙන් ගෝලීය බලශක්ති සැපයුමට එල්ල වී ඇති බාධා හමුවේ, දකුණු කොකේසස් කලාපයේ (South Caucasus) උපායමාර්ගික වැදගත්කම පෙර නොවූ විරූ ලෙස ඉහළ ගොස් තිබේ. මෙම අර්බුදය හමුවේ ආසියාව සහ යුරෝපය යා කරන ආරක්ෂිත බලශක්ති සහ ප්රවාහන මාවතක් ලෙස අසර්බයිජානය සහ ජෝර්ජියාව සිය සහයෝගීතාවය තවදුරටත් පුළුල් කිරීමට පියවර ගෙන ඇත. අසර්බයිජාන ජනාධිපති ඉල්හාම් අලියෙව් (Ilham Aliyev) සහ ජෝර්ජියානු අගමැති ඉරැක්ලි කොබකිඩ්සේ (Irakli Kobakhidze) අතර ඊයේ (අප්රේල් 06) ටිබිලිසිහිදී පැවැති තීරණාත්මක හමුවකදී මේ පිළිබඳව විශේෂ අවධානයක් යොමු විය. එහිදී ඉරානය හරහා වැටී ඇති සාම්ප්රදායික වෙළඳ මාර්ග අවදානමට ලක්ව ඇති බැවින්, කැස්පියන් මුහුද හරහා වැටී ඇති “මධ්යම කොරිඩෝව” හෙවත් ට්රාන්ස්-කැස්පියන් ජාත්යන්තර ප්රවාහන මාර්ගය (TITR) වඩාත් කාර්යක්ෂම කිරීමට දෙරටේ නායකයෝ එකඟ වූහ.
යුරෝපයට අවශ්ය තෙල් සහ ගෑස් සපයන ප්රධාන මාර්ගයක් ලෙස දකුණු කොකේසස් කලාපය දැන් වඩාත් තීරණාත්මක වී ඇති අතර, හෝර්මුස් සමුද්ර සන්ධිය වැනි මුහුදු මාර්ග අවහිර වන විට ගොඩබිම් මාර්ග ඔස්සේ සිදුවන මෙම බලශක්ති සම්ප්රේෂණය ලෝක ආර්ථිකයට මහත් සහනයක් වනු ඇත. එමෙන්ම අසර්බයිජානය සහ ආර්මේනියාව අතර පවතින සබඳතා සාමාන්යකරණය කිරීම කලාපයේ ස්ථාවරත්වයට අත්යවශ්ය බවත්, ඒ සඳහා ජෝර්ජියාව ලබා දෙන දායකත්වය අසර්බයිජාන ජනාධිපතිවරයාගේ ඇගයීමට ලක් විය. ලෝක බලශක්ති වෙළඳපොළ දැඩි අස්ථාවරත්වයකට පත්ව ඇති මොහොතක, අසර්බයිජානය සහ ජෝර්ජියාව අතර පවතින මෙම මූලෝපායික හවුල්කාරිත්වය ආසියානු සහ යුරෝපීය මහද්වීපයන් යා කරන “ආරක්ෂිත පාලමක්” ලෙස ක්රියා කරන බව විදේශීය විචාරකයෝ පෙන්වා දෙති.
