2026 අයවැය මඟින් යෝජනා කරන ලද බදු ප්රතිපත්ති ක්රියාත්මක කිරීම සඳහා 2022 අංක 25 දරන සමාජ ආරක්ෂණ දායකත්ව බදු පනතට ඉදිරිපත් කළ සංශෝධන පනත් කෙටුම්පතට රජයේ මුදල් පිළිබඳ කාරක සභාවේ අනුමැතිය හිමිව තිබේ. පාර්ලිමේන්තු මන්ත්රී ආචාර්ය හර්ෂ ද සිල්වා මහතාගේ සභාපතිත්වයෙන් පසුගියදා (අප්රේල් 02) රැස්වූ මෙම කාරක සභාවේදී අදාළ තීරණය ගෙන ඇත.
මෙම නව සංශෝධනවලට අනුව 2026 ජූලි මස 01 වන දින සිට ක්රියාත්මක වන පරිදි සමාජ ආරක්ෂණ දායකත්ව බද්ද (SSCL) සඳහා ලියාපදිංචි විය යුතු වාර්ෂික පිරිවැටුම් සීමාව රුපියල් මිලියන 60 සිට රුපියල් මිලියන 36 දක්වා අඩු කිරීමට නියමිතය. එසේම 2026 මැයි මස 01 වන දින සිට ක්රියාත්මක වන පරිදි වාහන ආනයනය කිරීමේදී හෝ නිෂ්පාදනය කර විකිණීමේදී මෙම බද්ද අය කෙරෙන අතර, තොග හෝ සිල්ලර වෙළඳාමේදී එම බද්දෙන් නිදහස් කිරීමට පියවර ගෙන තිබේ. මෙහිදී අදහස් දැක්වූ සභාපතිවරයා පෙන්වා දුන්නේ සමාජ ආරක්ෂණ දායකත්ව බද්ද සහ එකතු කළ අගය මත බද්ද (VAT) යන බදු දෙවර්ගයම සංශෝධනය කර තනි බදු වර්ගයක් හඳුන්වා දීමේ අවශ්යතාව පවතින බවයි.
මීට අමතරව අපනයනකරුවන්ට දේශීය ඩොලර් බැඳුම්කරවල ආයෝජනය කිරීමට පහසුකම් සැලසීම අරමුණු කරගනිමින් ඉදිරිපත් කළ අපනයන ඉපැයීම් මෙරටට ගෙන ඒමේ රීති සංශෝධනයටද කාරක සභාවේ අනුමැතිය හිමිවිය. ඒ අනුව මින් පෙර අපනයනකරුවන්ට තම ආදායමෙන් 10%ක් දක්වා ආයෝජනය කිරීමට අවසර ලැබී තිබූ ශ්රී ලංකා සංවර්ධන බැඳුම්කර (SLDBS) සඳහා වූ සීමාව ඉවත් කර ඇති අතර, දැන් ඔවුන්ට එම 10% රජය විසින් නිකුත් කරනු ලබන ඕනෑම විදේශ මුදල් ණය සුරැකුමක ආයෝජනය කිරීමට අවස්ථාව හිමිවනු ඇත.
