2026 යල කන්නයේ වගා කටයුතුවල නිරත වන ගොවි ජනතාව සඳහා පොහොර මූල්ය සහනාධාරය අඛණ්ඩව ලබාදීමට අමාත්ය මණ්ඩලයේ අනුමැතිය හිමිව තිබේ. පසුගිය මහ කන්නයේදී සාර්ථකව ක්රියාත්මක කරන ලද මෙම සහන වැඩපිළිවෙළ එළඹෙන යල කන්නය සඳහා ද දීර්ඝ කිරීමට රජය තීරණය කර ඇත්තේ කෘෂිකාර්මික නිෂ්පාදන පිරිවැය අඩු කරමින් දේශීය ආහාර සුරක්ෂිතතාව තහවුරු කිරීමේ අරමුණිනි. මෙම සහනාධාරය සෘජුවම ගොවීන්ගේ බැංකු ගිණුම් වෙත ලබාදීමට අවශ්ය කටයුතු සම්පාදනය කර ඇති අතර එමගින් අතරමැදියන්ගෙන් තොරව නිසි ප්රතිලාභ ගොවි ජනතාවට හිමිවනු ඇතැයි අපේක්ෂා කෙරේ.
මෙම සහන වැඩපිළිවෙළ යටතේ වී වගාව සිදුකරන ගොවීන් සඳහා හෙක්ටයාරයකට රුපියල් 25,000 බැගින් මූල්ය සහනාධාරයක් හිමිවන අතර, එක් ගොවියෙකුට උපරිම වශයෙන් හෙක්ටයාර දෙකක් සඳහා මෙම සහනය ලබාගත හැකිය. වී වගාවට අමතරව කුඹුරු ඉඩම්වල වෙනත් නිර්දේශිත භෝග වගා කරන ගොවීන් සඳහා ද හෙක්ටයාරයකට රුපියල් 15,000 බැගින් උපරිම හෙක්ටයාර දෙකක් සඳහා සහනාධාර ලබාදීමට රජය තීරණය කර තිබේ. පවතින ආර්ථික තත්ත්වය හමුවේ ගොවි ජනතාව මුහුණ දෙන මූල්ය අසීරුතා මඟහරවා ගනිමින් සාර්ථක යල කන්නයක් අස්වද්දා ගැනීමට මෙම රජයේ මැදිහත්වීම විශාල ශක්තියක් වනු ඇත.
