ශ්රී ලංකා මුහුදු සීමාව ආසන්නයේදී අනතුරට ලක්වූ ‘අයිරිස් දේනා’ (IRIS Dena) ඉරාන නෞකාවේ සිටි නාවිකයන්ට සහ කැඩෙට් නිලධාරීන්ට ශ්රී ලංකාව ලබාදුන් මානුෂීය ආධාර සහ ආගන්තුක සත්කාර වෙනුවෙන් ඉරාන තානාපති ආචාර්ය අලිරේසා ඩෙල්කොෂ් මහතා සිය කෘතඥතාව පළ කළේය. අද (23) පැවති මාධ්ය හමුවකදී ඒ මහතා සඳහන් කළේ ඉන්දියාවේ නාවික අභ්යාසයකින් පසු මිත්රශීලී සංචාරයක නිරතව සිටි මෙම නෞකාවට ඇමරිකානු සබ්මැරීනයක් මගින් එල්ල කළ ප්රහාරය දැඩි ලෙස හෙළා දකින බවයි. ඉරානය තුළ රැඳී සිටින ශ්රී ලාංකිකයන්ගේ ආරක්ෂාව සහ යහපැවැත්ම තහවුරු කිරීමට අවශ්ය සියලු පියවර ගෙන ඇති අතර ඔවුන්ට මෙතෙක් කිසිදු ගැටලුවක් වාර්තා වී නොමැති බවද ඔහු මෙහිදී අවධාරණය කළේය.
යම් හෙයකින් ඉරානයේ සිටින ශ්රී ලාංකිකයන් මෙරටට පැමිණීමට කැමති නම් තුර්කිය වැනි අසල්වැසි රටවල් හරහා ඔවුන්ට අවශ්ය ගමන් පහසුකම් සැලසීමට ඉරානය සූදානම් බවත් ශ්රී ලංකාව මිත්රශීලී ජාතියක් ලෙස සලකන ඕනෑම අර්බුදකාරී අවස්ථාවක සහයෝගයෙන් කටයුතු කරන බවත් තානාපතිවරයා වැඩිදුරටත් පැවසීය. ශ්රී ලංකා රජය විසින් ඉරාන නාවිකයින්ට දැක්වූ මානුෂීය සැලකිල්ල දෙරට අතර පවතින ශක්තිමත් ද්විපාර්ශ්වික සබඳතා තවදුරටත් තහවුරු කරන්නක් බවද ඔහු මෙහිදී පෙන්වා දුන්නේය.
