ශ්රී ලංකා මුහුදු සීමාවට සැතපුම් 450ක් පමණ දුරින් වූ ගැඹුරු මුහුදේ එන්ජිම අක්රීය වූ කුඩා යාත්රාවක දින පහක් තිස්සේ පාවෙමින් සිටි ඉන්දුනීසියානු ජාතික ධීවරයෙකුගේ දිවි බේරා ගැනීමට අම්බලන්ගොඩ ධීවරයෝ පිරිසක් සමත්ව සිටිති. අම්බලන්ගොඩ ධීවර වරායෙන් පිටත්ව ගිය “රෙශිත පුතා 07” බහුදින ධීවර යාත්රාවේ සිටි පිරිස විසින් මෙම මානුෂීය මෙහෙයුම සිදුකර ඇත්තේ ඉකුත් 12 වැනිදා පස්වරුවේදීය.
ධීවරයින් පවසන පරිදි, ඔවුන් මෙම විදේශීය ධීවරයා සොයාගන්නා අවස්ථාව වන විට ඔහු නිරාහාරව සහ අර්ධ සිහිසුන් තත්ත්වයෙන් පසුවී ඇත. ඉතා දුෂ්කර ප්රයත්නයකින් පසුව ඔහුව සිය යාත්රාවට නංවාගත් අම්බලන්ගොඩ ධීවරයින්, මුලින්ම ග්ලූකෝස් මිශ්ර ජලය සහ දියර ආහාර ලබා දෙමින් ඔහුගේ සෞඛ්ය තත්ත්වය යහපත් කිරීමට කටයුතු කර තිබේ. පසුව ඔහුට ඝන ආහාර ලබා දී ශක්තිමත් කළ බවත්, එම අවස්ථාවේ නිසි මැදිහත්වීම සිදු නොවූයේ නම් ඔහු මියයෑමට පවා ඉඩ තිබූ බවත් ධීවරයෝ පවසති.
මෙම ඉන්දුනීසියානු ධීවරයා සිය කුඩා බෝට්ටුව සමඟ මුහුදේ අතරමංව ඇත්තේ දින පහකට පමණ ඉහතදී වන අතර, මේ වන විට ඔහු සුවය ලබමින් පසුවේ. සිය ජීවිත අවදානම පවා නොතකා සිදුකළ මෙම ක්රියාව පිළිබඳව අම්බලන්ගොඩ ධීවර ජනතාව මෙන්ම බලධාරීන් ද සිය ප්රසාදය පළ කර සිටිති.
