2030 වසර වන විට මෙරට පිළිකා රෝගීන්ගේ වාර්තා වීම 23%කින් ඉහළ යනු ඇතැයි පුරෝකථනය කර ඇති පසුබිමක, පිළිකා කල්තියා හඳුනාගැනීමට අත්යවශ්ය වන FDG (Fluorodeoxyglucose) විකිරණශීලී ඖෂධය ශ්රී ලංකාව තුළම නිෂ්පාදනය කිරීම ආරම්භ කළ බව විද්යා හා තාක්ෂණ අමාත්ය මහාචාර්ය ක්රිෂාන්ත අබේසේන මහතා පවසයි.
කටුනායක කිඹුලාපිටිය ප්රදේශයේ පිහිටි ශ්රී ලංකා ආයෝජන මණ්ඩල සැකසුම් කලාපයේ මෙම නව ඖෂධ නිෂ්පාදනාගාරය ඉදිකර තිබේ. මේ සඳහා ඇමරිකානු ඩොලර් හැටඅට ලක්ෂ හැත්තෑපන් දහසක ($6,875,000) දැවැන්ත ආයෝජනයක් සිදු කර ඇති අතර, මෙය මෙරට පරිශ්රයක විකිරණශීලී ඖෂධයක් නිපදවන ප්රථම අවස්ථාව ලෙස සටහන් වේ.
PET-SCAN පරීක්ෂණවලදී පිළිකා සෛල පවතින ස්ථාන සහ ඒවායේ ව්යාප්තිය නිවැරදිව හඳුනාගැනීමට මෙම FDG ඖෂධය මූලිකවම භාවිත කෙරේ. මෙතෙක් මෙම ඖෂධය ඉන්දියාවෙන් ආනයනය කළ අතර, එහි ඇති විකිරණශීලී ගුණය ඉතා වේගයෙන් ක්ෂය වීම නිසා (Radioactive decay) රෝගීන්ට ලබා දෙන අවස්ථාව වන විට එහි සක්රීයතාවයෙන් 97%ක්ම අහිමි වී තිබුණි. මෙරටදීම නිෂ්පාදනය කිරීම හරහා උපරිම සක්රීයතාවයකින් යුත් ඖෂධයක් රෝගීන්ට ලබා දීමටත්, ඒ හරහා රෝග විනිශ්චය වඩාත් නිවැරදිව සිදු කිරීමටත් අවස්ථාව සැලසේ.
මෙම ව්යාපෘතිය හරහා විදේශ විනිමය ඉතිරි කර ගැනීමට මෙන්ම පිළිකා රෝගීන්ට වඩාත් කාර්යක්ෂම සහ ගුණාත්මක ප්රතිකාර සේවාවක් ලබා දීමට හැකි වනු ඇතැයි සෞඛ්ය අමාත්යාංශය විශ්වාසය පළ කරයි.
