පසුගිය 23 වැනිදා මධ්යම රාත්රියේ සිට ක්රියාත්මක වූ 12.19%ක බස් ගාස්තු සංශෝධනයට අදාළ නව ගාස්තු සටහන සෑම බස් රථයක් තුළම මගීන්ට පෙනෙන සේ ප්රදර්ශනය කිරීම අනිවාර්ය බව බස්නාහිර පළාත් මාර්ගස්ථ මගී ප්රවාහන අධිකාරිය නිවේදනය කරයි. මගී සේවා අවසර පත්ර කොන්දේසි 16 (A) අනුව මෙම නීතිය ක්රියාත්මක වන අතර, නව ගාස්තු ප්රදර්ශනය නොකරන බස් රථවල බලපත්ර තාවකාලිකව හෝ ස්ථීරව අවලංගු කිරීමටත්, අදාළ හිමිකරුවන්ට දඩ පැනවීමටත් කටයුතු කරන බව එම අධිකාරිය අවධාරණය කරයි. මේ සම්බන්ධයෙන් සොයා බැලීම සඳහා විශේෂ වැටලීම් ද ආරම්භ කර ඇති අතර, නියමිත ගාස්තුවට වඩා වැඩිපුර මුදල් අය කරන බස් රථ පිළිබඳව 0112860860 හෝ 0702860860 යන වට්සප් අංකයට පැමිණිලි කළ හැකිය.
කැබිනට් අනුමැතිය ඇතිව සිදුකළ මෙම ගාස්තු සංශෝධනයට අනුව රුපියල් 27ක්ව පැවති අවම බස් ගාස්තුව රුපියල් 30 දක්වා ඉහළ නැංවුණු අතර, උපරිම බස් ගාස්තුව රුපියල් 2,422 දක්වා රුපියල් 263කින් ඉහළ ගියේය. මගී ජනතාවගෙන් නියමිත ගාස්තුව පමණක් අය කරන ලෙස ජාතික ගමනාගමන කොමිෂන් සභාව ද සියලුම බස් රථ හිමියන්ට සහ සේවකයන්ට උපදෙස් දී ඇත. යම් හෙයකින් වැඩිපුර ගාස්තු අය කරන්නේ නම් ජාතික ගමනාගමන කොමිෂන් සභාවේ 1955 ක්ෂණික දුරකථන අංකයට හෝ 0712595555 යන වට්සප් අංකයට පැමිණිලි ඉදිරිපත් කරන ලෙස මගී ජනතාවගෙන් ඉල්ලා සිටී.
