ඉරාන යුදමය වාතාවරණය හමුවේ ඇති වී තිබෙන සැපයුම් දාමයේ බාධා හේතුවෙන් ක්රියාත්මක වන ඉන්ධන කළමනාකරණ වැඩපිළිවෙළ යටතේ මගී ප්රවාහන සේවාවන් අඛණ්ඩව පවත්වාගෙන යාමට රජය තීරණය කර තිබේ. ජාතික ගමනාගමන කොමිෂන් සභාවේ සභාපති පී.ඒ. චන්ද්රපාල මහතා අවධාරණය කරන්නේ මගී ජනතාව මේ පිළිබඳව අනියත බියක් ඇති කර නොගත යුතු බවයි. රජය සතුව ඉන්ධන මිලදී ගැනීමට අවශ්ය ප්රතිපාදන පවතින නමුත්, වත්මන් තත්ත්වය මත පිරිමැස්මෙන් කටයුතු කිරීම සඳහා මෙම කළමනාකරණ පියවර ගෙන ඇති බව ඔහු පෙන්වා දෙයි.
මෙම නව වැඩපිළිවෙළ යටතේ මගී ප්රවාහන බස් රථයක් සඳහා සතියකට හිමිවන ඉන්ධන කෝටාව ලීටර් 60 සිට 360 දක්වා වූ පරාසයක් තුළ ලබා දීමට නියමිතය. මීට පෙර සඳහන් වූ ලීටර් 60 ක සීමාව වාණිජ ප්රවාහන රථ සඳහා පමණක් අදාළ වන බවත්, මගී ප්රවාහන බස් රථ සඳහා ධාවනය වන දුර ප්රමාණය අනුව අවශ්ය ඉන්ධන ප්රමාණය ගණනය කර ලබා දෙන බවත් ශ්රී ලංකා ගමනාගමන මණ්ඩලයේ සභාපති සජීව කන්නන්ගර මහතා පැහැදිලි කළේය. පුද්ගලික බස් රථ සඳහා QR කේතය නිසි පරිදි සැකසෙන තෙක් දිවයින පුරා පිහිටි ඩිපෝ 103 මඟින් ඉන්ධන ලබා දීමට කටයුතු සූදානම් කර ඇත.
ප්රවාහන අමාත්යාංශය, ලංකා ඛනිජ තෙල් නීතිගත සංස්ථාව, ජාතික ගමනාගමන කොමිෂන් සභාව සහ පළාත් ප්රවාහන අධිකාරීන් එක්ව මෙම ක්රියාවලිය අධීක්ෂණය කරනු ලබයි. විශේෂයෙන්ම බස්නාහිර පළාත තුළ පුද්ගලික බස් රථ සඳහා ඉන්ධන ලබා දෙන ඩිපෝව සහ අදාළ ප්රමාණයන් තීරණය කිරීමේ ක්රමවේදය පිළිබඳව බස්නාහිර පළාත් මාර්ගස්ථ මගී ප්රවාහන අධිකාරියේ සභාපති ගාමිණී ජයසිංහ මහතා කරුණු පැහැදිලි කර ඇති අතර, පාසල් සේවා සහ සෞඛ්ය සේවා රථ සඳහා ද ප්රමුඛතාවය ලබා දීමට පියවර ගෙන තිබේ.
