ගල් අඟුරු මිලදී ගැනීමේදී සිදුව ඇති මහා පරිමාණ වංචාව හේතුවෙන් රජයට සිදුව ඇති සමස්ත පාඩුව රුපියල් කෝටි 10,000 ඉක්මවන බව පාර්ලිමේන්තු මන්ත්රී ඩී.වී. චානක මහතා ප්රකාශ කළේය. අද (09) පාර්ලිමේන්තුවේ පැවති ඒකාබද්ධ විපක්ෂයේ විශේෂ මාධ්ය හමුවකට එක්වෙමින් මන්ත්රීවරයා සඳහන් කළේ අප්රේල් සිට ජුනි දක්වා මාස තුනක කාලය තුළ පමණක් මෙහි පාඩුව රුපියල් කෝටි 2,500ක් ලෙස ඇස්තමේන්තු කර ඇති බවයි.
විගණකාධිපති වාර්තාවට අනුව, ගල් අඟුරු නැව් 09ක් ප්රමිතියෙන් තොර වීම නිසා විදුලි ඒකක මිලියන 141ක් පද්ධතියට අහිමි වී ඇති අතර, එම හිඟය පියවීමට අධික පිරිවැයක් දරමින් ඩීසල් මගින් විදුලිය උත්පාදනය කිරීමට සිදුව තිබේ. වර්තමාන ඩීසල් මිල අනුව ඒකකයක් නිෂ්පාදනයට රුපියල් 125ක් වැය වන බැවින්, එම ඒකක මිලියන 141 සඳහා පමණක් රුපියල් බිලියන 11කට වඩා වැඩි අමතර පිරිවැයක් දැරීමට සිදුවන බව මන්ත්රීවරයා පෙන්වා දුන්නේය.
ඉදිරි ජුනි මාසයේදී ගල් අඟුරු හිඟයක් ඇතිවීමේ දැඩි අවදානමක් පවතින බවත්, එම තත්ත්වය හමුවේ නොරොච්චෝලේ බලාගාරයේ මෙගාවොට් 900ක ධාරිතාව උත්පාදනය කිරීමට ඩීසල් භාවිත කිරීමට සිදුවුවහොත් දැඩි විදුලි කප්පාදුවකට යාමට සිදුවනු ඇති බවත් ඔහු අනතුරු ඇඟවීය. මෙම ටෙන්ඩර් ක්රියාවලිය අන්ත දූෂිත බවට නව විගණකාධිපති වාර්තාවෙන් ද තහවුරු වී ඇතත්, ජනාධිපතිවරයා සහ විදුලිබල ඇමතිවරයා ඇතුළු රජය එය වසන් කිරීමට උත්සාහ කරන බවට ද මන්ත්රීවරයා මෙහිදී චෝදනා කළේය.
