ශ්රී ලංකා ක්රිකට් ආයතනය විසින් සිය ජාතික ඉහළ කාර්ය සාධන මධ්යස්ථානය (National High Performance Center) සඳහා නව පුහුණුකරුවන් දෙදෙනෙකු පත් කිරීමට පියවර ගෙන තිබෙනවා. ඒ අනුව වේග පන්දු පුහුණුකරු ලෙස රයන් වැන් නීකර්ක් (Ryan van Niekerk) සහ පන්දු රැකීමේ සහ දඟ පන්දු පුහුණුකරු ලෙස ජෝඩන් ග්රෙගරි (Jordan Gregory) පත් කර ඇති බවයි වාර්තා වන්නේ.
දකුණු අප්රිකානු ජාතිකයෙකු වන රයන් වැන් නීකර්ක් මීට පෙර 2023 සිට 2026 දක්වා කාලය තුළ නෙදර්ලන්ත ජාතික කණ්ඩායමේ පන්දු යැවීමේ පුහුණුකරු සහ අන්තර්කාලීන ප්රධාන පුහුණුකරු ලෙස සාර්ථකව කටයුතු කර තිබෙනවා. ඔහුට ජාතික පිරිමි කණ්ඩායම ඇතුළු සියලුම ජාතික කණ්ඩායම්වල වේග පන්දු යැවීමේ සංවර්ධන වගකීම් පැවරෙන අතර, ඔහු එළඹෙන අප්රේල් 15 වනදා සිට වසර දෙකක කාලයක් සඳහා සිය ධුරයේ වැඩ කටයුතු ආරම්භ කිරීමට නියමිතයි.
එමෙන්ම ජාතික පන්දු රැකීමේ සහ දඟ පන්දු පුහුණුකරු ලෙස පත් වූ ජෝඩන් ග්රෙගරිද මීට පෙර නෙදර්ලන්ත ක්රිකට් කණ්ඩායමේ පන්දු රැකීමේ උපදේශකයෙකු ලෙස කටයුතු කර අත්දැකීම් බහුල පුහුණුකරුවෙකි. ඔහුද රයන් වැන් නීකර්ක් මෙන්ම අප්රේල් 15 වනදා සිට වසර දෙකක ගිවිසුමකට යටත්ව සිය රාජකාරි ආරම්භ කරනු ඇති. මෙම නව පුහුණුකරුවන් දෙදෙනාම ශ්රී ලංකා කණ්ඩායමේ නව ප්රධාන පුහුණුකරු වන ගැරී කර්ස්ටන්ගේ (Gary Kirsten) නිර්දේශ මත මෙම තනතුරු සඳහා පත් කර ඇති බව සඳහන්.
